اٹھاون سالہ رپودمان سنگھ ملک اور پچپن سالہ اجیب سنگھ بگری

اس سلسلے میں دو کینیڈین نژاد سکھوں پر الزام ہے کہ انہوں نے 1985 میں بھارتی طیارے پر بم نصب کیا تھا جس کے نتیجے میں وہ طیارہ آئر لینڈ کے نزدیک بحرالکاہل کے اوپر ہوا میں پھٹ گیا تھا۔

اس حادثے میں تین سو انتیس افراد ہلاک ہو گئے تھے۔ گیارہ ستمبر 2001 کے حملوں کے قبل جدید تاریخ میں دہشت گردی کی یہ سب سے خوفناک واردات مانی جاتی تھی۔

اس حادثے میں مرنے والے افراد کے لواحقین کو یقین ہے کہ بیس برس کا عرصہ گزر جانے کے بعد اب وہ وقت آ گیا ہے جب انہیں انصاف مل جائے گا۔

پروز میڈن جن کے شوہر اس حادثے میں ہلاک ہو گئے تھے کا کہنا تھا کہ’ ہم بہت پر امید ہیں۔ میرا خیال ہے کہ اس دن ہمیں خوشی منانے کا موقع ملے گا۔‘

برٹش کولمبیا کی سپریم کورٹ کے جج این بروس جوزف سن بدھ کو اس بات کا فیصلہ کریں گے کہ آیا کہ استغاثہ ملزمان اٹھاون سالہ رپودمان سنگھ ملک اور پچپن سالہ اجیب سنگھ بگری پر جرم ثابت کرسکا ہے یا نہیں۔

اس فیصلے کو سننے کے لیے اس حادثے میں مرنے والے افراد کے اسی سے زیادہ لواحقین دنیا بھر سے وینکوور آ رہے ہیں۔

1985 میں جب یہ حادثہ پیش آیا تھا تو بھارت میں سکھ علیحدگی پسند تحریک زوروں پر تھی اور یہ دونوں ملزمان بھی اسی خالصہ تحریک کے حامیوں میں سے ہیں۔

استغاثہ نے اپنے دلائل میں کہا تھا کہ ان دونوں ملزمان نے گولڈن ٹیمپل کی بے حرمتی کا بدلہ لیے کے لیے یہ قدم اٹھایا تھا۔اس مقدمے کا مبینہ کلیدی کردار تلوندر سنگھ 1992 میں بھارتی پولیس کی حراست میں ہلاک ہوگیا تھا۔

یہ مقدمہ کینیڈا کی تاریخ کا سب سے بڑا اور سب سے مہنگا مقدمہ ہے اور اس پر اب تک قریباً تراسی ملین ڈالر خرچ آچکا ہے۔