سلمان رشدی کی موت کا فتوی آیت اللہ خمنی نے دیا تھا

ایران کی عسکری تنظیم نے کہا ہے کہ یہ فتوی نا قابل تنسیخ ہے۔ سلمان رشدی کے خلاف یہ فتوی ان کی متنازعہ کتاب ’ سیٹنک ورسز‘ کی اشاعت کے بعد جاری کیا گیا تھا۔

ایرانی حکومت نے ماضی میں اپنے آپ کو اس فتوی سے لاتعلقی کا اظہار کیا تھا۔

ایران کے انقلابی گارڈز نے جو کہ براہ راست ایران کے اعلی ترین رہنما آیت اللہ علی خامنہ ای کے سامنے جوابدہ ہیں کہا ہے کہ مسلمانوں نے اپنے عقائد کے خلاف اس طرح کے حملوں کو کبھی برداشت نہیں کیا۔

انہوں نے کہا کہ وہ دن دور نہیں جب رسول اور قرآن کی بے حرمتی کرنے والے اس مصنف کو اپنے انجام تک پہنچایا جائے گا۔

یہ فتوی انیس سو نوے کی دہائی میں آیت اللہ خمینی کے دور میں جاری کیا گیا تھا اور اس سے یورپ اور ایران کے تعلقات بھی متاثر ہوئے تھے۔

ایران کے انقلابی گارڈز کی طرف سے یہ بیان آیت اللہ علی خامنہ ای کے اس بیان کے دو دن بعد جاری کیا گیا ہے جس میں انہوں نے کہا تھا سلمان رشدی کو موت کی سزا دی جانی چاہیے۔

تہران میں بی بی سی کے نامہ نگار فرانسس ہیرسن نے کہا ہے کہ ایران کے مذہبی حلقوں کا خیال ہے کہ سلمان رشدی کے خلاف اس فتوی کو صرف وہ ہی ختم یا واپس لے سکتے ہیں جنہوں نے یہ جاری کیا تھا۔

ایران کے اصلاح پسند صدر محمد خاتمی نے ماضی میں کہا تھا کہ اس فتوی کو منسوخ کر دیا گیا ہے۔ سن انیس سو نواسی میں تہران نے برطانیہ کو یقین دلایا تھا کہ ایران اس فتوی پر عملدرآمد کرنے کے لیے کوئی اقدام نہیں کرئے گا۔

اس فتوی کے جاری ہونے کے بعد سے اب تک رشدی کو مستقل طور پر حفاظت میں رکھا جاتا ہے اور وہ برطانیہ میں تیس سے زیادہ گھر تبدیل کر چکے ہیں۔