حزب اختلاف کے رہنما وِکٹر یوش چینکو ایک ریلی کے دوران

اتوار کے روز وزیراعظم وِکٹر یانوکووِچ نے کہا کہ ملک تباہی کے دہانے پر ہے۔ لیکن انہوں نے اپنے حمایتیوں سے اپیل کی کہ وہ انتہائی اقدام سے گریز کریں۔

حزب اختلاف کے رہنما انتخابات میں بڑے پیمانے پر بدعنوانیوں کے الزامات عائد کررہے ہیں۔ امور خارجہ سے متعلق یورپی یونین کے سفیر ہیویئر سولانا نے بھی انتخابات میں بدعنوانیوں کے الزامات کے تحت ایک ’جمہوری حل‘ کا مطالبہ کیا ہے۔

روس، جس نے انتخابات کے نتائج کو قبول کرلیا تھا اور وزیراعظم کی حمایت کی تھی، سنیچر کے روز یہ کہا کہ اسے از سر نو انتخابات پر کوئی اعتراض نہیں ہوگا۔

سنیچر کے روز یوکرین کی پارلیمان نے انتخابات کے نتائج کو یہ کہتے ہوئے کالعدم قرار دے دیا تھا کہ وہ عوامی رائے کی نمائندگی نہیں کرتے۔

صدارتی انتخابات میں ماسکو حامی وزیراعظم وِکٹر یانوکووِچ کو فاتح قرار دیا گیا تھا۔ حزب اختلاف کے مغرب حامی رہنما وِکٹر یوش چینکو کے حمایتی لاکھوں کی تعداد میں کئی دنوں سے سڑکوں پر ہیں۔

حالیہ دنوں میں اس خدشے کا اظہار کیا جارہا تھا کہ کہیں ایسا نہ ہوکہ روس اپنی فوج یوکرین بھیج دے۔ بحر اسود پر واقع یوکرین میں روس کا اقتصادی اور فوجی اثر و رسوخ قائم ہے۔ یوکرین روس کا پڑوسی ملک ہے۔

سرد جنگ کے خاتمے پر مشرق یورپ کے کئی ممالک سوویت یونین سے الگ ہوگئے تھے لیکن یوکرین میں روس کا اثر و رسوخ باقی رہا ہے۔ گزشتہ چند دنوں سے کئی مغربی رہنما یوکرین کی حکومت اور حزب اختلاف کے رہنماؤں کے درمیان بات چیت کرانے کی کوشش کرتے رہے ہیں۔

وزیراعظم وکٹر یانوکووِچ اور حزب اختلاف کے رہنما وکٹر یوش چینکو نے جمعہ کے روز ملاقات کی تھی اور طاقت کے استعمال کو خارج از امکان بتایا تھا۔ یوکرین میں عوامی مظاہرے عوام کو ان دنوں کی یاد دلارہے تھے جب دیوار برلِن کے گرنے کے بعد مشرقی یورپ نے مغربی جمہوریت کو لبیک کہا۔