مسلم رہنماؤں کا کہنا ہے کہ مسلمان مزید حملوں کے خدشے سے خوفزدہ ہیں

پیر کے دن ہونے والے بم حملے میں اسکول کو نقصان پہنچا ہے کھڑکی اور دروازے پوری طرح تباہ ہوگئےلیکن کوئی جانی نقصان نہیں ہوا ۔

پولیسں کا کہنا ہے ہو سکتا ہے کہ یہ حملہ گزشتہ ہفتے فلمساز تھیو واں گوف کی ہلاکت کے انتقام کے طور پر کیا گیا ہوجنہیں مشتبہ اسلامی شدت پسندوں نے ہلاک کیا ہے۔

حالیہ دنوں میں ہالینڈ کے کئی شہروں میں مساجد کو حملوں کا نشانہ بنایا گیا ہے ۔پولیسں واں گوف کے قتل اور اس بم حملے کے درمیان کسی تعلق کی تحقیق کر رہی ہے۔

مسلمانوں کے خلاف انتقامی کارروائی کے خدشے کے پیش نظر ہالینڈ کی پولیس انتہائی چوکس ہے۔

فلمساز واں گوف کو منگل کے دن ایمسٹرڈیم میں گولی مار کر قتل کر دیاگیا تھا اس سلسلے میں کئی لوگوں کو گرفتار کیا گیا ہے۔

ہالینڈ کی حکومت نے مسلم شدت پسندوں کے خلاف سخت کارروائی کرنے کا عہد کیا ہے۔

پولیسں کا کہنا ہے کہ انہیں واں گوف کی لاش کے نزدیک سے ایک خط ملا ہے جس میں آزاد خیال سیاسی رہنما ایان حرسی علی کو قتل کرنے کی دھمکی دی گئی ہے۔

محترمہ حرسی ایک صومالی خاتون ہیں اور واں گوف کی متنازعہ فلم کی اسکرپٹ انہوں نے ہی لکھی ہے اور اس میں اسلام میں عورتوں کے ساتھروا رکھے جانے والے سلوک پرنکتہ چینی کی گئی ہے۔