لطاف حسین بدھ کی رات لندن سے بھارت کے لیے روانہ ہوئے

ایم کیو ایم کے قیام کے بعد ایم کیو ایم کے جلاوطن رہنما کا یہ پہلا دورہ ہے۔ وہ گزشتہ بارہ سال سے لندن میں ہیں اور خود ساختہ جلاوطنی کی زندگی گزار رہے ہیں۔

ہندوستان ٹائمز کی کانفرنس ’بھارت اور دنیا‘ دہلی میں جمعرات کو منعقد ہو گی اور الطاف حسین اس کانفرنس کے دوسرے دور میں مرکزی مقرر ہوں گے۔

کانفرنس کے دوسرے مقررین میں برطانیہ کے سابق وزیراعظم جان میجر، عراق کے لیے اقوام متحدہ کے سابق چیف معائنہ کار ہانس بلکس، تھائی لینڈ کے وزیر سوراکیات ساتھیراتھئی، سابق بھارتی وزیرخارجہ نٹور سنگھ، سابق امریکی وزیر خارجہ ہینری کیسنجر، اور سابق بھارتی سکریٹری خارجہ للت مان سنگھ کے علاوہ کئی اور اہم لوگ بھی شامل ہیں۔

الطاف حسین ماضی میں کئی بار بھارت کے دورے کا اعلان کر کے وہاں نہیں جاسکے۔ گزشتہ سال دسمبر میں بھی الطاف حسین نے بھارت جانے کا اعلان کیا تھا مگر چند ناگزیر وجوہات کی بنا پرانہوں نے اپنا دورہ ملتوی کر دیا تھا۔

ایم کیو ایم سیکریٹریٹ کے مطابق اس کانفرنس میں الطاف حسین اپنا اور پارٹی کا موقف کانفرنس کے سامنے بیان کریں گے۔ اس کانفرنس کا مقصد بھارت بشمول قریبی و ہمسایہ ممالک سے پارٹنرشپ، معاشی، اسٹریٹجک اور سیاسی مستقبل کے طور طریقوں کا خاکہ بنانا ہے۔