سکاٹش بلیک واچ رجنمٹ جو جنوبی عراق میں امریکی فوجیوں کی جگہ لے گی

ان برطانوی فوجیوں کا تعلق سکاٹش بلیک واچ رجمنٹ سے ہے۔ اور برطانیہ میں بعض سیاست داں یہ الزام لگا رہے ہیں کہ اس تعیناتی کا مقصد صدر بش کو ان کی انتخابی مہم میں مدد دینا ہے۔

بغداد میں نامہ نگاروں کو بتایا گیا ہے کہ یہ برطانوی فوجی ان امریکی فوجیوں کی جگہ لیں گے جو ان علاقوں پر ممکنہ امریکی حملے میں حصہ لیں گے جو مزاحمت کاروں کے کنٹرول میں ہیں۔

امریکی فوجیوں کی جگہ لینے کے لیے حرکت میں آنے والے امریکی فوجیوں کی تعداد آٹھ سو سے زائد بتائی گئی ہے تاہم دفاعی حکمت عملی کے پیش نظر یہ نہیں بتایا گیا کہ جنوب میں یہ برطانوی فوجی کس مقام پر امریکیوں فوجیوں کی جگہ لیں گے۔

اس سے پہلے امریکی محکمہ دفاع نے ان اطلاعات کی تصدیق کی ہے عراق میں مزید امریکی فوج بھیجنے پر غور ہو رہا ہے تاکہ اگلے سال جنوری میں عراق میں میں ہونے والے انتخابات میں تحفظ کی فضا کو بہتر بنایا جا سکے۔

محکمہ دفاع کے مطابق اس امکان پر بھی غور ہو رہا ہے کہ عراق میں موجود تجربہ کار امریکی فوجیوں کو وہاں سے نہ نکالا جائے اور ان کی جگہ لینے کے لیے آنے والے فوجیوں کی آمد سے عراق میں امریکی فوجیوں کی تعداد بڑھ جائے گی۔

پینٹاگن میں بی بی سی کے نمائندے کےمطابق عراق میں مزید امریکی فوجی بھیجنے کا فیصلہ اگلے ہفتے ہونے والے صدارتی انتخابات کے بعد ہی کیا جا سکے گا۔

تاہم برطانوی معترضین کا کہنا ہے کہ بغداد کے جنوب میں برطانوی فوجیوں کو اس علاقے میں متعین کیا جا رہا ہے کو جہاں کے لوگ غیر ملکی فوجیوں کے بارے میں انتہائی ناپسندیدگی کے جذبات رکھتے ہیں۔

ان کا کہنا ہے کہ یہ ایک سیاسی فیصلہ ہے تاہم برطانوی حکومت نے اس کی تردید کی ہے۔