 |  ایک فلسطینی ننھے منیر کو اٹھائے بھاگ رہا ہے۔ لیکن منیر بعد میں مر گیا |
شمالی غزہ کے پناہ گزین کیمپ جبالیہ اور غربِ اردن کے دو علاقوں میں اسرائیلی فوج اور فلسطینیوں کے درمیان جھڑپوں کے نتیجے میں آٹھ فلسطینی ہلاک اور پچیس کے قریب زخمی ہوگئے ہیں۔ اطلاعات کے مطابق سینکڑوں فلسطینیوں کی اسرائیلی فوج کے ساتھ جھڑپیں ہوئیں جو ٹینکوں اور بکتر بند گاڑیوں میں پناہ گزیں کیمپ کے محاصرے کے لیے وہاں آئے تھے۔ شمالی غزہ کیمپ میں ہلاک ہونے والے پانچ فلسطینیوں میں ایک دس سالہ بچہ بھی شامل ہے۔ عینی شاہدین کے مطابق منیر دیکیس اس وقت ہلاک ہوا جب وہ اپنے دادا کے گھر کے سامنے کھیل رہا تھا۔ اس پر ایک ٹینک کے اوپر لگی ہوئی مشین گن سے فائر کیا گیا۔ اس کے بعد اماری پناہ گزین کیمپ میں بھی ایک پندرہ سالہ لڑکا اسرائیلی فوجیوں کی جیپ کے نیچے آ کر ہلاک ہو گیا۔ فوجیوں نے غرب اردن کے علاقے جریکو میں شدت پسند گروہ الاقصیٰ مارٹیئر بریگیڈ کے ایک رکن کو بھی گولی مار کر ہلاک کر دیا۔ اسرائیلی فوج کا کہنا ہے کہ جبالیہ کے پناہ گزیں کیمپ کے ارد گرد فوج کی تعیناتی اس لیے کی گئی ہے تاکہ شدت پسند اسرائیلی فوج پر راکٹ داغنا بند کریں۔ غزہ میں بی بی سی کے نامہ نگار کا کہنا ہے کہ اسرائیل کے لیے حماس تنظیم کی اس حکمتِ عملی کا جواب تلاش کرنا مشکل ہو رہا ہے جس کے تحت اسرائیل کے ان علاقوں میں جہاں عام شہری رہتے ہیں، ادھر ادھر راکٹ داغے جاتے ہیں۔ منگل کو حماس نے عہد کیا تھا کہ وہ ان چودہ رہنماؤں کے قتل کا انتقام لے گی جنہیں غزہ میں شدت پسندوں کے ایک تربیتی کیمپ میں میزائل مار کر ہلاک کر دیا گیا تھا۔ ادھر اسرائیل نے پھر دھمکی دی ہے کہ وہ یاسر عرفات کو غربِ اردن سے باہر نکال دے گا۔ اسرائیل کے وزیرِ خارجہ سلوان شالوم کا کہنا ہے کہ ’ہمارے درمیان عرفات کے لیے کوئی جگہ نہیں ہے اور یہ کہ یاسر عرفات کو ملک بدر کردینے کا امکان عملی صورت پانے کے اب اتنا قریب ہے جتنا پہلے کبھی نہیں تھا‘۔ | 
یہ صفحہ دوست کو ای میل کیجیئے
پرِنٹ کریں
