ایتھنز میں جنگ مخالف مظاہرین امریکی سفارتخانے جانا چاہتے تھے

وزارتِ خارجہ کے ایک ترجمان نے کہا کولن پاول نے واشنگٹن میں کام کی مصروفیت کی وجہ سے دورہ منسوخ کیا ہے۔

ایتھنز میں جمعہ کے روز ہزاروں جنگ مخالف افراد نے امریکی وزیر خارجہ کولن پاول کی آمد کے خلاف مظاہرے کیے ہیں۔ مظاہرین نے بش انتظامیہ کے خلاف نعرے لگائے اور عراق اور افغانستان میں فوجی آپریشن کی مذمت کی۔

مظاہرین امریکی سفارت خانے تک جانا چاہتے تھے لیکن پولیس نے ان کا راستہ روک دیا۔

مظاہرے کے دوران کچھ جھڑپیں بھی ہوئیں جن کی وجہ سے پولیس کو آنسو گیس کا استعمال کرنا پڑا۔ مظاہرین نے، جو مشرق وسطیٰ میں امریکی پالیسیوں کی مخالفت کررہے تھے، توڑ پھوڑ کی۔ بعض مظاہرین فلسطینی پرچم لیے ہوئے تھے۔

مظاہرے میں شریک ایک شخص نے بی بی سی کو بتایا: ’ہم یہاں اس لیے ہیں کیونکہ ہم سمجھتے ہیں کہ کولن پاول کو یونان نہیں آنا چاہئے تھا۔۔۔ ہم امریکہ مخالف نہیں ہیں، ہم امریکی سامراجیت کی مخالفت کرتے ہیں۔‘

ایتھنز میں کھیلے جانے والے اولمپک گیمز میں امریکہ نے سب سے زیادہ تمغے جیتے ہیں۔ اولمپک گیمز کی اختتامی تقریب اتوار کو ہو گی۔