سیستانی ایسے وقت لندن پہنچ رہے ہیں جب نجف میں لڑائی جاری ہے

آیت اللہ سیستانی کے ایک ترجمان نے کہا کہ اتنے لمبے سفر نے انہیں نڈھال کر دیا ہے اور اب اگلے چند دنوں تک وہ آرام کریں گے۔

بیروت کے بین الاقوامی ہوائی اڈے کے حکام نے بتایا کہ آیت اللہ سیستانی کو ایک چارٹر طیارے کے ذریعے بیروت لایا گیا جہاں سے وہ لندن کے لیے روانہ ہو گئے۔

عراق کے شیعہ فرقے کے رہنما جو نجف میں مقیم ہیں کافی عرصے سےدل کے عارضے میں مبتلہ ہیں۔ ان کے معاونین کا کہنا ہے کہ نجف میں موجودہ صورت حال کے پیش نظر ان کا علاج ممکن نہیں رہا اس لیے انہیں لندن لیے جایا جا رہا ہے۔

نجف میں ریڈیکل شیعہ رہنما مقتدی الصدر کے حامیوں کی امریکی اور عراقی سکیورٹی فورس سے ایک مرتبہ پھر شدید جھڑپیں شروع ہو گئی ہیں۔ نجف میں گزشتہ دو دن میں چودہ افراد ہلاک اور بہت سے زخمی ہو چکے ہیں۔

بغداد کے الصدر شہر کے علاقے سے بھی شدید لڑائی کی اطلاعات موصول ہو رہی ہیں اور بین الاقوامی خبر رساں ادارے وہاں سے بھی بڑے جانی نقصان کی اطلاعات دے رہے ہیں۔

اس کے علاوہ بصرہ میں بھی مقتدی الصدر کے حامیوں نے گزشتہ کئی ماہ کی خاموشی کے بعد برطانوی فوج کے خلاف جہاد کا اعلان کر دیا ہے۔