بیروت حزب اللہ کا مضبوط گڑھ ہے

حزب اللہ کے ذرائع کا کہنا ہے کہ غالب اوّلی پیر کی صبح گھر سے نکل رہے تھے کہ دھماکے کا شکار ہو گئے۔

دھماکہ بیروت کے جنوبی نواحی علاقے میں ہوا جو شدت پسند شیعہ تنظیم حزب اللہ کا مضبوط گڑھ ہے۔

غیر مصدقہ اطلاعات میں کہا گیا ہے کہ ایک شدت پسند سنی گروہ جند الشام نے اس حملے کی ذمہ داری قبول کی ہے۔

عینی شاہدین کے مطابق غالب اوّلی نے جونہی گاڑی سٹارٹ کی تو وہ دھماکے سے پھٹ گئی۔

حزب اللہ کے زیر نگرانی چلنے والے ٹی وی سٹیشن المنار پر تباہ شدہ گاڑی کی تصاویر دکھائی گئی ہیں اور اوّلی کو ’اسلامی مزاحمت کا شہید‘ قرار دیا گیا ہے۔

حزب اللہ کے ارکان نے سن دو ہزار میں جنوبی لبنان سے اسرائیلی قبضہ ختم کرانے میں مرکزی کردار ادا کیا تھا اور اسرائیلی سیکیورٹی ایجنسیاں تنظیم کی قیادت کو نشانہ بناتی رہی ہے۔

حزب اللہ کے رہنما عباس الموسوی کی گاڑی پر انیس سو بانوے میں اسرائیل کی طرف سے فضائی حملہ کیا گیا تھا جس کے باعث موسوی ہلاک ہو گئے تھے۔