اسرائیلی فوج ماضی میں بھی لبنان پر حملے کرتی رہی ہے

مقامی حکام کے مطابق یہ حملہ بیروت کے بیس کلومیٹر جنوب میں ’ناعمہ‘ کے پہاڑوں میں کیا گیا ہے۔

اس علاقے میں فلسطین کی آزادی کے لئے شام کی حمایت یافتہ تنظیم پاپولر فرنٹ کا اڈہ ہے۔

تنظیم کے ترجمان نے کہا ہے کہ اسرائیلی طیاروں نے جس علاقے پر حملہ کیا ہے وہاں کوئی عسکری تنصیب نہیں ہے اور وہاں عام شہریوں کے ٹھکانے ہیں جن میں ایک کلینک بھی شامل ہے۔ انہوں نے مزید کہا کہ ابھی تک کسی جانی نقصان کی اطلاع نہیں ملی ہے۔

اسرائیلی فوجی حکام نے کہا ہے کہ یہ حملہ ایک بحریہ کے جہاز پر فلسطینی حملے کے بعد کیا گیا ہے۔ تاہم اس سے زیادہ انہوں نے اس حملے کی کوئی تفصیل نہیں بتائی ہے۔

اسرائیلی فوج ماضی میں بھی لبنان پر حملے کرتی رہی ہے۔