میرا گلا گھونٹنے کی کوشش کی گئی: کنہیا کمار

انڈیا کی معروف یونیورسٹی جے این یو میں سٹوڈینٹس یونین صدر کنہیا کمار نے ٹویٹ کے ذریعے الزام لگایا ہے کہ جیٹ ایئر ویز کے طیارے میں ان پر ایک مسافر نے حملہ کیا ہے۔

اتوار کے اپنے متعدد ٹویٹس میں کنہیا کمار نے الزام لگایا کہ طیارے کے اندر ان کا گلا دبانے کی کوشش کی گئی۔

٭ <link type="page"><caption> کنہیا کمار کے حیدرآباد یونیورسٹی جانے پر پابندی</caption><url href="http://www.bbc.com/urdu/regional/2016/03/160323_hyderabad_university_unrest_mb.shtml" platform="highweb"/></link>

٭ <link type="page"><caption> بھگت سنگھ اپنے زمانے کے کنہیا کمار تھے؟</caption><url href="http://www.bbc.com/urdu/regional/2016/03/160321_bhagat_singh_kanhaiya_jnu_row_mb.shtml" platform="highweb"/></link>

انڈیا کی خبررساں ایجنسی پی ٹی آئی نے بتایا ہے کہ پولیس نے اس معاملے میں ایک شخص کو حراست میں لیا ہے۔

مبینہ حملہ کرنے والے نوجوان سے ایئر پورٹ کے سیکورٹی اہلکار پوچھ گچھ کر رہے ہیں۔

اس سے قبل کنہیا پر کئی بار حملے ہو چکے ہیں جن میں عدالت میں ہونے والا حملہ بھی شامل ہے۔ کنہیا کمار چند ماہ قبل جے این میں ہونے والے ایک پروگرام کے نتیجے میں غداری کے الزام میں جیل جانے کے بعد سے شہ سرخیوں میں ہیں۔

کنہیا ممبئی سے جیٹ ایئر ویز کی فلائٹ سے پونے جانے والے تھے۔

کنہیا نے لکھا: ’ایک بار پھر، اس بار طیارے کے اندر، ایک شخص نے میرا گلا گھونٹنے کی کوشش کی۔‘

جیٹ ایئر ویز کو ٹوئٹر پر ٹیگ کرتے ہوئے کنہیا نے لکھا: ’جیٹ ایئر ویز نے ہمیں اور جس شخص نے حملہ کیا تھا اسے بھی سیکورٹی وجوہات سے ہوائی جہاز سے اترنے کے لیے کہا۔‘

کنہیا نے الزام لگایا: ’اس واقعے کے بعد جیٹ ایئر ویز کے عملے نے اس شخص کے خلاف کوئی بھی کارروائی کرنے سے انکار کر دیا جس نے مجھ پر حملہ کیا تھا۔‘

کنہیا نے لکھا: ’جیٹ ایئر ویز جس پر حملہ ہوا اور جس نے حملہ کیا اس میں کوئی تمیز نہیں کرنا چاہتی۔ اگر آپ شکایت کریں گے تو وہ آپ کو طیارے سے اتار دیں گے۔‘

ابھی اس واقعے پر جیٹ ایئر ویز کی جانب سے کوئی باضابطہ بیان نہیں آیا ہے۔

ممبئی سے بی بی سی کے نامہ نگار سشات موہن نے جیٹ ایئر ویز کے حکام کے حوالے سے بتایا ہے کہ اس سلسلے میں باضابطہ بیان جلد جاری کیا جائے گا۔

انھوں نے حکام کے حوالے سے بتایا کہ کنہیا کمار اور ایک دوسرے شخص کے درمیان جھگڑا ہونے پر قوانین کے تحت دونوں کو طیارے سے اتار دیا گیا۔