کولکتہ کے’ کابلی والے‘

ہزاروں کی تعداد میں افغان باشندے کئی دہائیوں سے بھارت کے شہر کولکتہ (کلکتہ) میں مقیم ہیں۔ موسکا نجیب اور نازش افروز نے ان افغانوں کی کہانی کو عکس بند کرنے کی کوشش کی ہے۔

1892 میں نوبیل انعام یافتہ ادیب رابندر ناتھ ٹیگور نے ایک کہانی لکھی جس کا عنوان تھا ’کابلی والا‘۔ یہ افغانستان کے دوردراز علاقے کے ایک ایسے شخص کی کہانی تھی جو کولکتہ میں رہتا تھا۔ گذشتہ ایک صدی سے یہ کہانی بنگال میں بسنے والے افغانوں کا ایک تعارف بنی ہوئی ہے۔

ان افغان مردوں کو چہرے مہرے سے الگ پہچانا جا سکتا ہے۔ یہ اپنا روایتی لباس پہنتے ہیں اور اپنے آبائی وطن سے ہزاروں میل دور کولکتہ کو اپنا دوسرا گھر مانتے ہیں۔

رابندر ناتھ ٹیگور کی کہانی سے اخذ کیا گیا یہ نام آج بھی استعمال میں ہیں اور کولکتہ کے افغان کابلی والا ہی کہلاتے ہیں جس کا مطلب ہے کابل کے لوگ۔ یہ شہر ان کا نیا گھر تو ہے لیکن یہاں وہ اپنی الگ شناخت برقرار رکھے ہوئے ہیں۔

داداگل خان کولکتہ میں 50 برس سے بھی زیادہ عرصے سے اپنی بھارتی اہلیہ اور خاندان کے ساتھ رہ رہے ہیں۔

خان صاحب پیدا تو افغانستان میں ہوئے لیکن نوعمری میں ہی ان کے والد انھیں بھارت لے آئے۔ ان کی اہلیہ مقامی ہیں اور بیٹا کرکٹ کا شوقین۔

پہلے زمانے میں کابلی والے گھر گھر جا کر مصالحے، خشک میوہ جات اور عطر فروخت کیا کرتے تھے۔ وقت گزرنے کے ساتھ ساتھ انھوں نے کاروبار بھی تبدیل کر لیے اور اب کچھ شہر کے بڑا بازار کے علاقے میں درزی کا کام کرتے ہیں۔

کابلی والے اکثر شہر کے ریستورانوں میں مقامی خوراک سے لطف اٹھاتے بھی دیکھے جا سکتے ہیں۔

کچھ کابلی والوں کے پاس نسل در نسل منتقل ہونے والی یادگاری نشانیاں ہیں۔ یہاں سلطان خان اپنی والدہ کا لباس دکھا رہے ہیں جو نصف صدی پرانا ہے۔

صدیوں پرانی روایات نے نسلوں کو باندھ کر رکھا ہے اور انھی روایات کے سہارے یہ چھوٹی سی کمیونٹی باقی رہی ہے۔ آج کے کولکتہ میں ایک کروڑ 60 لاکھ کی آبادی میں ان کابلی والوں کی تعداد محض پانچ ہزار ہے۔

بہت سے کابلی والے اگرچہ کولکتہ میں پیدا ہوئے اور یہاں ایک ایسے شہری کے طور پر زندگی گزاری جس کی کوئی شناخت یا ریاست نہیں تھی لیکن اس کے باوجود اس شہر نے انھیں اس قبرستان میں ان کی آخری آرام گاہ دی جس پر ان کے شناختی کتبے نصب ہیں۔