ہلمند: شادی کی تقریب میں راکٹ گرنے سے 20 ہلاک
افغانستان میں ایک شادی کی تقریب میں راکٹ گرنے سے کم از کم 20 افراد ہلاک اور 40 سے زیادہ زخمی ہوگئے ہیں۔
یہ واقعہ بدھ کو صوبہ ہلمند کے ضلع سنگین میں افغان فوجیوں اور طالبان شدت پسندوں کے مابین لڑائی کے دوران پیش آیا۔
اس حملے میں ہلاک اور زخمی ہونے والوں میں عورتیں اور بچے بھی شامل ہیں۔
راکٹ کا نشانہ بننے والے مکان کے مالک عبدالحلیم کا کہنا ہے کہ جب یہ حملہ ہوا تو مہمان دلھن کے استقبال کے لیے مکان کے باہر جمع تھے۔
ان کا کہنا ہے کہ خود ان کے نو بچے اس واقعے کے بعد سے لاپتہ ہیں۔
’میں نے صرف جسموں کے ٹکڑے جمع کیے ہیں۔ میں نہیں جانتا کہ یہ میرے بچوں کے ٹکڑے ہیں یا کسی اور کے۔‘
سنگین کی پولیس کے ترجمان فرید احمد عبید نے خبر رساں ادارے ایسوسی ایٹڈ پریس کو بتایا کہ حملے میں کم از کم 45 افراد زخمی ہوئے ہیں جنھیں لشکر گاہ میں واقع ہسپتال لے جایا گیا ہے۔
خیال رہے کہ بدھ کو ہی افغانستان میں 13 برس کے بعد امریکہ اور نیٹو افواج کا جنگی مشن اپنے اختتام کو پہنچا ہے۔
End of سب سے زیادہ پڑھی جانے والی
اب افغانستان میں سکیورٹی کی ذمہ داریاں ساڑھے تین لاکھ ارکان پر مشتمل افغان سکیورٹی فورسز نے سنبھال لی ہیں جنھیں طالبان کی جانب سے مزاحمت کا سامنا ہے۔
افغانستان میں سنہ 2014 افغان سکیورٹی فورسز اور شہریوں کے لیے مہلک ترین رہا ہے اور اس دوران پانچ ہزار فوجی اور پولیس اہلکار اور اندازاً دس ہزار شہری حملوں میں ہلاک یا زخمی ہوئے ہیں۔
