بھارت: کیرالہ میں شراب پر پابندی کا منصوبہ

بھارت کی جنوبی ریاست کیرالہ میں حکام نے ریاست میں شراب کی خرید و فروخت پر پابندی لگانے کا منصوبہ تیار کر لیا ہے۔

ابتدائی طور پر ریاست میں 700 شراب خانوں اور چند دکانوں کو بند کیا جائے گا اور شراب کی خرید و فروخت کی ممانعت والے ایام میں اضافہ کیا جائے گا۔

وزیراعلیٰ اُمّن چانڈی کا کہنا ہے کہ حکومت کا دس سال میں شراب پر مکمل پابندی لگانے منصوبہ ہے۔

بھارت میں سب سے زیادہ شراب کیرالہ میں پی جاتی ہے جہاں اوسطاً فی کس آٹھ لیٹر شراب سالانہ پی جاتی ہے۔

ڈاکٹروں اور دیگر افراد کا کہنا ہے کہ شراب نوشی کی بڑھتی ہوئی شرح کی وجہ سے ریاست میں طلاق کی شرح اور سڑکوں پر حادثوں میں اضافہ ہو رہا ہے۔

ڈاکٹروں کا کہنا ہے کہ ہسپتال اور بحالی کے مراکز مریضوں سے بھرے ہوئے ہیں اور مریضوں کو شراب نوشی سے منسلک شکایات ہیں۔

اُمًن چانڈی کا کہنا ہے کہ کانگریس کی حکومت چند مجوزہ اقدامات کے ذریعے ’شراب سے پاک‘ کر دے گی۔

وزیراعلیٰ نے کہا کہ حکومت شراب پر مکمل پابندی مرحلہ وار انداز میں لگانا چاہتی ہے۔ ان کا کہنا تھا کہ لوگوں کو اس عرصے میں مکمل پابندی کے لیے تیار ہو جانا چاہیے۔

نامہ نگاروں کا کہنا ہے کہ ریاست میں تاجر برادری کو خدشہ ہے کہ اس پابندی کی وجہ سے ریاست میں سیاحت کو نقصان پہنچے گا۔ بھارت میں سب سے زیادہ سیاح کیرالہ آتے ہیں۔

ابھی تک یہ بھی واضح نہیں کہ حکومت شراب نوشی سے آنے والی آمدنی کا کیا متبادل پیش کرے گی جو کہ اس کی سالانہ آمدن کا 20 فیصد ہے۔