ایمن الظواہری: القاعدہ سربراہ اور اسامہ بن لادن کے جانشین افغانستان میں امریکی ڈرون حملے میں ہلاک
،تصویر کا ذریعہReuters
امریکی صدر نے تصدیق کی ہے کہ افغانستان میں ایک امریکی ڈرون حملے میں القاعدہ کے سربراہ ایمن الظواہری ہلاک ہو گئے ہیں۔ اُنھیں سی آئی اے نے افغانستان کے دارالحکومت کابل میں ایک ڈرون حملے میں نشانہ بنایا۔
صدر جو بائیڈن نے ایک مختصر خطاب میں بتایا کہ ایمن الظواہری گیارہ ستمبر کے حملوں کی منصوبہ بندی میں بھی شامل تھے اور وہ اسامہ بن لادن کے جانشین تھے۔
ان کا کہنا تھا کہ وہ کئی دہائیوں تک امریکیوں کے خلاف ہونے والی کارروائیوں میں ملوث تھے۔
صدر بائیڈن نے اپنے خطاب میں کہا کہ ’ہم یہ واضح کرنا چاہتے ہیں کہ کچھ فرق نہیں کتنا بھی وقت لگے، آپ جہاں بھی چھپے ہوں، اگر آپ ہمارے لوگوں کے لیے خطرہ ہیں تو آپ جہاں بھی ہوں گے امریکہ آپ کا پتا چلائے گا اور آپ کو وہاں سے نکالے گا۔‘
ان کا کہنا تھا کہ ایمن الظواہری کس جگہ پر موجود ہیں اس بارے میں پتا لگایا گیا اور میں نے اس آپریشن کی اجازت دی۔
انھوں نے تصدیق کی کہ یہ آپریشن کابل میں ہوا تاہم ان کا دعویٰ تھا کہ اس کارروائی میں نہ کوئی سویلین ہلاکت ہوئی اور نہ ہی ایمن الظواہری کے خاندان کا کوئی فرد مارا گیا۔
امریکی حکام کا کہنا ہے کہ ایمن الظواہری کو جب ڈرون حملے میں نشانہ بنایا گیا تو وہ کابل میں اپنے گھر کی بالکونی میں کھڑے تھے۔ حکام کا کہنا ہے کہ ان کے اہلِ خانہ اسی گھر میں موجود تھے تاہم وہ حملے میں محفوظ رہے۔
خیال رہے کہ اسامہ بن لادن کی سنہ 2011 میں ہلاکت کے بعد ایمن الظواہری نے القاعدہ کی قیادت سنبھالی تھی۔
End of سب سے زیادہ پڑھی جانے والی
دوسری جانب افغانستان میں طالبان ترجمان نے بھی کہا ہے کہ اتوار کو کابل کے رہائشی علاقے شیر پور میں امریکہ نے ڈرون حملہ کیا۔
اپنی ٹویٹ میں ذبیح اللہ مجاہد نے بتایا کہ ابتدا میں اس واقعے کی نوعیت معلوم نہیں تھی، پھر سکیورٹی اور انٹیلیجنس ایجنسیز کی تحقیقات سے پتا چلا کہ یہ ڈرون حملہ تھا۔
انھوں نے اپنے بیان میں اسے بین الاقوامی اصولوں اور دوحہ معاہدے کی ’واضح خلاف ورزی‘ قرار دیا ہے۔
طالبان کے ترجمان نے اسے گذشتہ 20 سال کے ناکام تجربات کو دوہرانے کے مترادف قرار دیا اور کہا کہ اس قسم کے اقدامات امریکہ، افغانستان اور خطے کے مفادات کے خلاف ہیں۔
گارڈن کوریرا کا تجزیہ
بی بی سی، نمائندہ سکیورٹی
ایمن الظواہری القاعدہ کے نظریاتی دماغ تھے۔
ایمن الظواہری مصری ڈاکٹر ہیں جنھیں سنہ 1980 کی دہائی میں عسکریت پسند اسلام میں شامل ہونے کے جرم میں قید کیا گیا تھا۔ رہائی کے بعد انھوں نے ملک چھوڑ دیا اور پرتشدد بین الاقوامی جہادی تحریکوں میں شامل ہو گئے۔
بالآخر وہ افغانستان میں جا بسے اور ایک امیر سعودی شہری اسامہ بن لادن کے گروہ میں شامل ہو گئے۔ ان دونوں نے مل کر امریکہ کے خلاف اعلان جنگ کیا اور 11 ستمبر 2001 کے حملوں کا منصوبہ بنایا۔
اس تحریر میں ایسا مواد ہے جو X کی جانب سے دیا گیا ہے۔ کسی بھی چیز کے لوڈ ہونے سے قبل ہم آپ سے اجازت چاہتے ہیں کیونکہ یہ ممکن ہے کہ وہ کوئی مخصوص کوکیز یا ٹیکنالوجیز کا استعمال کر رہے ہوں۔ آپ اسے تسلیم کرنے سے پہلے X ککی پالیسی اور پرائیویسی پالیسی پڑھنا چاہیں گے۔ اس مواد کو دیکھنے کے لیے ’تسلیم کریں، جاری رکھیں‘ پر کلک کریں۔
X پوسٹ کا اختتام
امریکہ کو بن لادن کا سراغ لگانے اور مارنے میں ایک دہائی سے زیادہ کا عرصہ لگ گیا۔ ان کے بعد ایمن الظواہری نے القاعدہ کی قیادت سنبھالی، لیکن وہ ایک الگ تھلگ اور معمولی شخص بن کر رہ گئے جو کبھی کبھار ہی پیغامات جاری کیا کرتے تھے۔
امریکہ ان کی موت کو ایک فتح کے طور پر بتائے گا، خاص طور پر گذشتہ سال افغانستان سے انخلاء کے بعد، لیکن دولت اسلامیہ جیسے نئے گروپ اور تحریکوں کے روز بروز بااثر ہونے کے نتیجے میں الظواہری کے اثرو رسوخ نسبتاً معمولی ہی رہے۔ بہر حال اس میں کوئی شک نہیں کہ ان کے بعد القاعدہ میں ایک نیا رہنما ابھرے گا، لیکن ممکنہ طور پر اس کا اپنے پیشرو سے بھی کم اثر و رسوخ ہوگا۔
ایمن الظواہری کون تھے؟
ایمن الظواہری 19 جون 1951 کو مصر کے دارالحکومت قاہرہ میں پیدا ہوئے۔ وہ متوسط طبقے سے تعلق رکھنے والے ڈاکٹروں اور علما کے ایک قابلِ احترام گھرانے کا حصہ تھے۔
ان کے دادا رابعہ الظواہری مشرقِ وسطیٰ کے سنی تعلیمات کے مرکز ’الازہر‘ کے امام تھے۔ اس عرصے میں ان کے ایک چچا عرب لیگ کے سیکرٹری جنرل تھے۔
ایمن الظواہری سکول کے زمانے سے ہی مذہبی سیاست میں شامل ہو گئے۔ انھیں 15 برس کی عمر میں مصر کی کالعدم قرار دی جانے والی قدیم ترین اور بڑی اسلامی تنظیم الاخوانِ المسلمون کا رکن بننے کے وجہ سے گرفتار کیا گیا۔
قاہرہ میں طب کی تعلیم کے حصول کے دوران بھی ان کی سیاسی سرگرمیاں نہیں رکیں۔ انھوں نے 1974 میں گریجویشن کیا اور چار سال بعد سرجری میں ماسٹرز ڈگری حاصل کی۔
ایمن الظواہری کے والد محمد ادویات سازی کے پروفیسر تھے۔ وہ 1995 میں انتقال کر گئے۔
ایمن الظواہری پیشے کے لحاظ سے آنکھوں کے سرجن تھے اور انھوں نے مصر میں عسکریت پسند گروہ اسلامک جہاد کی بنیاد رکھنے میں مدد کی۔
،تصویر کا ذریعہAFP
انھیں القاعدہ کے سابق سربراہ اسامہ بن لادن کا نائب اور القاعدہ تنظیم کا مرکزی منصوبہ ساز سمجھا جاتا تھا۔ بعض ماہرین کا کہنا ہے کہ امریکہ میں نائن الیون کے دہشت گرد حملے انہی کے منصوبے کے تحت کیے گئے۔
الظواہری امریکہ کی جانب سے دنیا کے مطلوب ترین افراد کی فہرست میں اسامہ کے بعد دوسرے نمبر پر تھے۔ ان کے سر کی قیمت ڈھائی کروڑ امریکی ڈالر لگائی گئی تھی۔
الظواہری کو 13 جنوری 2006 کو پاکستانی سرحد کے قریب افغانستان کی حدود میں امریکی میزائل حملوں کا نشانہ بنایا گیا۔ اس حملے میں القاعدہ کے چار ارکان ہلاک ہوئے تاہم الظواہری بچ گئے تھے۔
حملے کے تین ہفتے بعد انھوں نے ایک ویڈیو کے ذریعے امریکی صدر جارج ڈبلیو بش کو خبردار کرتے ہوئے کہا کہ ’نہ تو وہ اور نہ ہی کرّہ ارض پر موجود کوئی اور طاقت انھیں جان سے مار سکتی ہے۔‘
8 جون 2011 کو اپنی ویب سائٹ پر جاری ایک پیغام میں الظواہری نے کہا کہ ’اسامہ بن لادن مرنے کے بعد بھی امریکہ کو خوفزدہ کرتے رہیں گے۔‘
اسامہ بن لادن کی ہلاکت کے بعد القاعدہ کی جنرل کمانڈ کی طرف سے جاری ہوئے ایک بیان کے مطابق اسامہ بن لادن کے نائب ایمن الظواہری کو تنظیم کا نیا سربراہ مقرر کیا گیا۔
،تصویر کا ذریعہGetty Images
قدامت پسند نوجوان
الظواہری نے پہلے تو خاندانی روایت کے مطابق قاہرہ ہی میں ایک طبی کلینک کھولا لیکن جلد ہی وہ ایک قدامت پرست اسلامی گروپ کی جانب متوجہ ہو گئے۔ یہ گروپ مصر کی حکومت کا خاتمہ چاہتا تھا۔
سنہ 1973 میں اسلامک جہاد کے قیام کے بعد وہ اس میں شامل ہو گئے۔
سنہ 1981 میں مصری صدر انور سادات کے فوجی پریڈ کے دوران قتل کے بعد ایمن الظواہری سمیت تنظیم کے سینکڑوں مشتبہ افراد کو حراست میں لیا گیا۔
صدر سادات کے اسرائیل کے ساتھ امن معاہدہ کرنے اور سینکڑوں ناقدین کی سکیورٹی کریک ڈاؤن میں حراست کے بعد اسلامی کارکن کافی ناراض تھے۔
ان افراد کے خلاف قائم مقدمے کے دوران الظواہری ایک رہنما کے طور پر سامنے آئے۔
مزید پڑھیے
الظواہری صدر سادات کے قتل کے مقدمے سے تو بری ہو گئے تاہم انھیں غیر قانونی اسلحہ رکھنے پر تین برس قید کی سزا ہوئی۔
جیل میں الظواہری کے ساتھ موجود قیدیوں کے مطابق حکام ان پر تشدد کرتے تھے۔ کہا جاتا ہے کہ یہی تجربہ ان کے اندر پرجوش اور پرتشدد انتہا پسندی کے جذبات پیدا کرنےکی وجہ بنا۔
سنہ 1985 میں رہائی کے بعد الظواہری سعودی عرب چلے گئے۔ اس کے فوراً بعد ہی وہ پاکستان کے شہر پشاور آئے اور یہاں سے وہ ہمسایہ ملک افغانستان چلے گئے۔ یہاں انھوں نے مصر کے اسلامک جہاد کی ایک شاخ بنائی اور ملک پر سوویت یونین کے قبضے کے دوران ایک ڈاکٹر کی حیثیت سے کام کیا۔
سنہ 1993 میں اس گروہ کے دوبارہ یکجا ہونے کے بعد وہ اس کے سربراہ بن گئے۔ مصر کے وزیرِ اعظم عاطف صدیقی سمیت کئی مصری وزیروں پر ہونے والے حملوں میں انھوں نے اہم کرادار ادا کیا۔
اس گروپ نے 90 کی دہائی کے وسط میں حکومت کا تحتہ الٹنے اور یہاں اسلامی ریاست کے قیام کے لیے ایک مہم چلائی۔ جس میں 1200 سے زائد مصری باشندے ہلاک ہوئے۔
سنہ 1999 میں مصر کی ایک فوجی عدالت نے اس گروپ کی جانب سے کیے گئے متعدد حملوں میں اہم کردار ادا کرنے پر اُنھیں غائبانہ طور پر سزائے موت سنائی۔
،تصویر کا ذریعہAFP
مغربی اہداف کے خلاف حملے
خیال کیا جاتا ہے کہ الظواہری نے 90 کے دہائی میں محفوظ ٹھکانوں اور مالی ذرائع کی تلاش میں دنیا بھر کا سفر کیا۔ مانا جاتا ہے کہ افغانستان سے سوویت انخلا کے بعد کے برسوں میں وہ بلغاریہ، ڈنمارک اور سوئٹزرلینڈ میں بھی رہے اور کبھی کبھی اُنھوں نے جعلی پاسپورٹس پر بلقان ممالک، آسٹریا، یمن، عراق، ایران اور فلپائن کا سفر بھی کیا۔
دسمبر 1996 میں مبینہ طور پر اُنھیں بغیر کارآمد ویزا کے چیچنیا کا سفر کرنے پر روس میں گرفتار کر لیا گیا۔
مبینہ طور پر الظواہری کی ایک تحریر میں یہ دعویٰ کیا گیا کہ روسی حکام اُن کے کمپیوٹر میں موجود عربی دستاویزات کا ترجمہ نہیں کر سکے اور یوں وہ اپنی شناخت خفیہ رکھنے میں کامیاب رہے۔
مانا جاتا ہے کہ سنہ 1997 میں الظواہری افغانستان کے شہر جلال آباد چلے گئے جہاں اسامہ بن لادن مقیم تھے۔
ایک برس بعد مصری اسلامک جہاد نے اسامہ بن لادن کی القاعدہ سمیت پانچ دیگر شدت پسند گروہوں کے اتحاد 'ورلڈ اسلامک فرنٹ' میں شمولیت اختیار کر لی جس کا مقصد 'یہودیوں اور صلیبیوں' کے خلاف جنگ کرنا تھا۔
اس محاذ کا پہلا اعلان ایک فتوے کی صورت میں سامنے آیا جس میں امریکی شہریوں کے قتل کو مباح قرار دیا گیا تھا۔ چھ ماہ بعد کینیا اور تنزانیہ میں امریکی سفارت خانوں پر بیک وقت حملوں میں 223 افراد ہلاک ہوئے۔
الظواہری ان لوگوں میں سے تھے جن کی ٹیلیفونک گفتگو سے یہ ثبوت ملا کہ اس حملے کے پیچھے القاعدہ اور اسامہ بن لادن تھے۔
دو ہفتوں کے بعد امریکہ نے افغانستان میں اس گروہ کے تربیتی مراکز پر حملے کیے۔ اگلے روز الظواہری نے ایک پاکستانی صحافی کو فون کیا اور کہا: 'امریکہ کو بتا دیں کہ اس کی بمباری، اس کی دھمکیوں، اس کی جارحیت سے ہم خوف زدہ نہیں ہوں گے۔ ابھی تو یہ جنگ شروع ہوئی ہے۔'
