بیجنگ کا ڈاشنگ ایئرپورٹ: چین کے وسیع ’سٹار فش‘ نما ہوائی اڈے کا افتتاح

چین کی 70ویں سالگرہ کے موقع پر ملک میں 11 ارب ڈالر کی لاگت سے تیار کردہ ایک نئے ہوائی اڈے کا افتتاح کردیا گیا ہے۔

ملک کے دارالحکومت بیجنگ میں ڈاشنگ انٹرنیشنل ایئرپورٹ کا باقاعدہ افتتاح چینی صدر شی جن پنگ نے بدھ کو کیا۔

حکام کا کہنا ہے کہ بیجنگ میں پہلے سے موجود ایئرپورٹ پر رش کی وجہ سے ایک دوسرے ہوائی اڈے کی ضرورت پیش آئی۔

تیانانمن سکوئر سے 46 کلومیٹر جنوب میں واقع ڈاشنگ ایئرپورٹ کی منفرد بات یہ ہے کہ آسمان سے اس کی شکل ایک سٹار فش جیسی دکھائی دیتی ہے۔ اسے معروف آرکیٹکٹ زها حديد‎ نے ڈیزائن کیا ہے۔

چین کے اخبار چائنہ ڈیلی کے مطابق بیجنگ کا ڈاشنگ ایئرپورٹ سات لاکھ مربع میٹر پر پھیلا ہوا ہے۔ آپ ایسے سمجھ لیں کہ یہ فٹبال کے 98 میدانوں جتنا بڑا ہے۔

ایئرپورٹ کونسل کے مطابق بیجنگ ایئرپورٹ دنیا کا دوسرا بڑا ہوائی اڈہ ہے جبکہ پہلا امریکہ کے شہر اٹلانٹا میں واقع ہے لیکن ڈاشنگ ایئرپورٹ کی ایک ہی عمارت میں دنیا کا سب سے بڑا ٹرمینل ہے۔

چین کے سرکاری خبر رساں ادارے گلوبل ٹائمز نے کہا ہے کہ افتتاح پر سات اندرونِ ملک پروازوں کی کمپنیاں اس ہوائی اڈے سے اپنے آپریشنز کا آغاز کریں گی۔ یہ ایئرپورٹ سنہ 2025 تک 17 کروڑ مسافروں کا استقبال کرے گا۔

بین الاقوامی ایئرلائنز میں سے بریٹش ایئرویز، کیتھے پیسیفک اور فن ایئر نے ڈاشنگ ایئرپورٹ سے اپنی پروازوں کا اعلان کردیا ہے۔

۔