جزیرہ نما عرب کی سرزمین پر کسی بھی پوپ کا پہلا دورہ

مسیحی فرقے رومن کیتھولک کے روحانی پیشوا پوپ فرانسِس متحدہ عرب امارت کا تین روزہ دورہ مکمل کرنے کے بعد واپس ویٹیکن روانہ ہوگئے۔ جزیرہ نما عرب میں رومن کیتھولک فرقے کے کسی بھی روحانی پیشوا کا یہ پہلا دورہ تھا۔

انھیں اس دورے کی دعوت ابو ظہبی کے ولی عہد شہزادہ محمد بن زید النیہان نے دی تھی۔ اس موقع پر انھوں نے ایک بین المذاہب کانفرنس میں شرکت۔ اس کے علاوہ ایک دعائیہ تقریب کی امامت بھی کی جس میں سنی مسلمانوں کے عالم اور جامعہ الازہر کے سربراہ، شیخ احمد الطیب نے بھی شرکت کی تھی۔

پوپ فرانسِس نے اس موقع پر مشرقِ وسطیٰ میں یمن میں جاری جنگ سمیت باقی تشدد آمیز تصادم کو ختم کرنے کی دعا کی ہے۔ انھوں نے مشرق وسطیٰ کے مسلمانوں سے یہ بھی کہا کہ وہ مقامی مسیحوں کو اپنے برابر کے شہری کے طور پر قبول کریں۔

ابو ظہبی میں بین المذاہب کے مکالمے میں شرکت کے دوران پوپ فرانسس نے سنی مسلمانوں کے بڑے عالم اور جامعہ الازہرکے سربراہ شیخ احمد الطیب سے ملاقات کی۔ اس موقع پر شیخ احمد الطیب نے کہا کہ مسیحی ہمارے ساتھی ہیں۔

پوپ فرانسِس کی روانگی سے قبل آج ہزاروں مسیحوں اور مسلمانوں نے ابو ظہبی میں ایک مشترکہ دعائیہ تقریب میں حصہ لیا تھا۔ جزیرہ نما عرب کی تاریخ میں یہ پہلی مرتبہ ہوا ہے کہ مسیحوں کے روحانی پیشوا نے اس سرزمین پر مسیحوں کی اتنی بڑی تقریب میں شرکت کی۔

دعائیہ تقریب میں شریک ایک مسیحی خاتون، پاموا جراوان اپنی خوشی کے اظہار میں کہا کہ 'یہ رواداری کے سال کی بہترین علامت ہے۔ یہ ثابت کر رہا ہے کہ اب یہ لوگ کتنے کھلے پن کا مظاہرےہ کر رہے ہیں۔ میں تو بہت خوش ہوں۔'

ابو ظہبی کے زید سپورٹس سٹی سٹیڈیم میں پوپ فرانسِس کو دیکھنے کے لیے سوا لاکھ سے زائد مسیحوں نے شرکت کی۔ ابوظہبی کے سٹیڈیم سے لے کر دور واقع شیخ زید مسجد تک لوگوں قطار بنائے پوپ کی ایک جھلک دیکھنے کی کوشش کر رہے تھے۔

امریکی اعداد و شمار کے مطابق، متحدہ عرب امارت کی کل آبادی کا تیرہ فیصد حصہ مسیحوں پر مشتمل ہے۔ ابو ظہبی میں ہونے والے اس بین المذہبی مکالمے میں مسلم ممالک سے چار ہزار وفود سمیت تقریباً سو مسیحی وفود بھی نے بھی شرکت کی۔

پوپ فرانسِس ابو ظہبی کے ولی عہد شہزادہ شیخ محمد بن زید النیہان کی دعوت پر امارات کا تین روزہ دورہ کیا جس کا مقصد مسیحوں اور مسلمانوں کے درمیان تعاون کو بہتر سے بہتر کرنا ہے۔