شہزاد ملک بی بی سی اردو ڈاٹ کام، اسلام آباد

	کابینہ پہلے ہی ان ملازمین کی بحالی کی منظوری دے چکی ہے

اس ضمن میں سینیچر کو ایک آرڈینینس جاری کیا گیا ہے جس میں کہا گیا ہے کہ ان ملازمین کو فوری طور پر اُن کے عہدوں پر بحال کیا جائے اور وہ تمام مراعات کے اہل ہوں گے جو کہ سرکاری ملازمین کو ملتی ہیں۔

اس آرڈینیس کو بل کی صورت میں پارلیمنٹ میں پیش کیا جائے گا جہاں پر اس کی منظوری کے بعد اسے قانونی شکل دی جائے گی۔

حکومت نے ان ملازمین کی بحالی کے لیے وفاقی وزیر رضا ربانی کی سربراہی میں ایک کمیٹی تشکیل دی تھی جس میں حکمراں اتحاد میں شامل دیگر سیاسی جماعتوں کے نمائندے بھی شامل تھے جنہوں نے اپنی سفارشات مرتب کر کے وزیراعظم کو بھجوا دی تھیں۔

وفاقی کابینہ کے گذشتہ ماہ ہونے والے اجلاس میں برطرف کیے جانے والے ان سرکاری ملازمین کو تین سال کی مراعات اور ترقی کے ساتھ بحال کرنے کی منظوری دی جا چکی ہے۔

ایک اندازے کے مطابق ان افراد کو تین سال کی مراعات دینے پر پاکستانی حکومت کو سات سے آٹھ ارب روپے خرچ کرنا پڑیں گے۔

سات سے آٹھ ہزار ملازمین انٹیلی جنس بیورو، سوئی ناردرن اور سوئی سدرن گیس کمپنیوں، تیل اور گیس کی کارپوریشن، پاکستان سٹیٹ آئل، پی آئی اے، سول ایوی ایشن اتھارٹی، سٹیٹ لائف، زرعی ترقیاتی بینک، صحت، تعلیم اور دیگر شعبوں سے برطرف کیے گئے تھے۔

زیادہ تر ملازمین سابق وزیراعظم میاں نواز شریف کے دور میں برطرف کیے گئے تھے اور اس کی وجہ ’سیاسی بنیادوں پر بھرتی‘ کو روکنا بتایا گیا تھا۔ بعد میں سینکڑوں ملازمین کو سپریم کورٹ کےحکم پر بحال بھی کیا گیا تھا لیکن کئی ملازمین کے گزشتہ دس سے بارہ برسوں سے مقدمات مختلف عدالتوں میں زیر التواٰ تھے جن کا فیصلہ نہیں ہو سکا تھا۔