صدر بش اور پاکستانی وزیراعظم مئی میں شرم الشیخ میں بھی ملے تھے

وزیراعظم گیلانی وزارتِ عظمٰی سنبھالنے کے بعد اپنے پہلے سرکاری امریکی دورے پر اتوار کو واشنگٹن پہنچے ہیں اور وہ اٹھائیس جولائی کو امریکی صدر جارج ڈبلیو بش، نائب صدر ڈک چینی اور وزیر خارجہ کونڈولیزا رائس سے ملاقاتیں کرنے والے ہیں۔

اطلاعات کے مطابق پاکستانی وزیراعظم اور امریکی صدر کے درمیان ہونے والی ملاقات کا اہم ترین موضوع مبصرین کے مطابق قبائلی علاقوں میں شدت پسندی کی روک تھام اور وہاں کیے جانے والے سمجھوتے ہوں گے۔

یاد رہے کہ امریکہ روانگی سے قبل وزیراعظم یوسف رضا گیلانی نے کہا تھا کہ دہشتگردی اور انتہا پسندی کے خلاف جنگ کسی بیرونی دباؤ کے تحت نہیں بلکہ ملکی مفاد میں لڑی جا رہی ہے۔انہوں نے کہا کہ پاکستان ہر قسم کی دہشت گردی کے خلاف ہے اور ملک کی سرزمین کسی دوسرے ملک کے خلاف جارحیت کے لیے استعمال نہیں کی جائے گی۔

ایک سوال کے جواب میں وزیر اعظم نے کہا کہ حکومت قبائلی علاقوں میں صرف اُن افراد سے مذاکرات کر رہی ہے جو ہتھیار پھینک کر حکومت کی عملداری کو تسلیم کر رہے ہیں۔

وزیراعظم کے ساتھ امریکہ جانے والے وفد میں وزیر اطلاعات شیری رحمان، امورِ داخلہ کے مشیر رحمان ملک، اقتصادی امور کی مشیر حنا ربانی کھر ، وزیر خارجہ شاہ محمود قریشی، وزیر دفاع احمد مُختار اور پانی و بجلی کے وفاقی وزیر راجہ پرویز اشرف شامل ہیں۔

یاد رہے کہ امریکی صدر بش اور پاکستانی وزیراعظم کے درمیان اسی برس مئی میں مصر کے سیاحتی مقام شرم الشیخ میں عالمی اقتصادی فورم کے دوران بھی ایک ملاقات ہوئی تھی۔

اس ملاقات کے وزیراعظم یوسف رضا گیلانی نے صحافیوں کو بتایا تھا کہ ملاقات کے دوران اقتصادی امور، غذائی قلت، توانائی کی کمی اور دہشت گردی کے خلاف جنگ سمیت مختلف امور پر جامع اور مفید بات چیت ہوئی تھی۔