عبادالحق بی بی سی اردو ڈاٹ کام، لاہور

	کانفرنس میں دہشت گردی سے نمٹنے کے طریقوں پر غور ہوگا۔

وزیر اعظم نے اس بات کا اعلان لاہور کے ہوائی اڈے پر صحافیوں سے بات چیت کرتے ہوئے کیا۔ انہوں نے کہا کہ ملک میں امن امان کی صورت حال کو بہتر بنانے کے لیے اتحادی جماعتوں کا دو زورہ اجلاس اسلام آباد میں ہوگا۔

ان کا کہنا ہے کہ اجلاس میں شرکت کے لیے سابق وزیر اعظم نواز شریف، عوامی نیشنل پارٹی کے اسفند یار ولی اور جمعیت علماء اسلام کے فضل الرحمن کو دعوت دی جارہی ہے۔

ان کے بقول اتحادی جماعت کے مشترکہ اجلاس کے بارے میں پیپلز پارٹی کے شریک چیئرمین آصف علی زرداری کو بھی اطلاع کردی گئی ہے۔

یوسف رضا گیلانی نے کہا کہ پاکستان ایک آزاد اور خود مختار ملک ہے اور کسی کو اس کے اندروانی معاملات میں مداخلت کا حق نہیں ہے۔

ایک سوال پر انہوں نے کہا کہ ’نواز شریف ہمارے اتحادی ہیں اور وہ ہمیں نہیں چھوڑ یں گے اس بارے کسی کو فکر مند ہونے کی ضرورت نہیں ہے۔‘

ان کا کہنا ہے کہ ججوں کے معاملے پر جو اختلاف رائے ہے اسے مل بیٹھ کر حل کرلیا جائے گا۔

ایک دیگر سوال کے جواب میں انہوں نے کہا کہ وفاقی کابینہ کو تین مرحلوں میں مکمل کیا جانا تھا لیکن مسلم لیگ نون کی کابینہ سے علیحدگی کی وجہ سے کابینہ کا دوسرا اور تیسرا مرحلہ مکمل نہ ہوسکا۔ تاہم اب اتحادی جماعتوں کی مشاورت کے بعد اس عمل کو مکمل کیا جارہا ہے۔

صدر پرویز مشرف کےموخذاے کے بارے میں سوال پر ان کا کہنا ہے کہ صدر خود واضح الفاظ میں کہہ چکے ہیں کہ وہ پارلیمنٹ کی بالادستی کو تسلیم کرتے ہیں اور پارلیمنٹ جو فیصلہ کرے گی وہ انہیں قبول ہوگا۔