عامر احمد خان بی بی سی اردو ڈاٹ کام، اسلام آباد

	مسلم لیگ نواز کی جانب سے شکوے شکایت پر مبنی بیان کے بعد ملک بھر میں چہ میگوئیاں ہونے لگتی ہیں

یہ پہلی بار نہیں کہ حکومت کی سب سے بڑی اتحادی جماعت مسلم لیگ نواز نے پاکستان پیپلز پارٹی سے اس نوعیت کا شکوہ کیا ہو۔ اس کے علاوہ بھی معزول ججوں کی بحالی سے لے کر صدر مشرف کے مواخذے تک وہ تمام معاملات جن پر ان دونوں جماعتوں میں اختلافات ہیں کسی مثبت پیشرفت کے منتظر ہیں۔

شاید اسی لیے مسلم لیگ نواز کی جانب سے اس طرح کے ہر بیان کے بعد ملک بھر میں چہ میگوئیاں ہونے لگتی ہیں کہ کیا حکومتی اتحاد ٹوٹنے والا ہے اور کیا ایسی صورت میں پاکستان پیپلز پارٹی اپنی حکومت قائم رکھ سکے گی؟ اس سوال کا جواب ملکی سیاست سے شاید کہیں زیادہ اس سیاست کے دو بڑے کرداروں میں چھپا ہے جنہیں اٹھارہ فروری کے انتخابات میں عوام نے اپنی قیادت کے لیے چنا۔

آخر ان کے دماغ میں ہے کیا؟

وکلاء تحریک کے لانگ مارچ سے چند روز پہلے لاہور کے وزیر اعلٰی میاں شہباز شریف سے ملاقات ہوئی تو انہوں نے صاف کہہ دیا کہ وہ کسی بھی صورت پارلیمنٹ کے گھیراؤ کے حق میں نہیں۔ ان کا یہ موقف ان کے بھائی اور مسلم لیگ نون کے سربراہ میاں نواز شریف سے قدرے مختلف نظر آتا تھا جو ہر قیمت پر عدلیہ کی بحالی کی بات کرتے ہیں۔

	بھٹو خاندان کا بینظیر مخالف دھڑا کئی سال بعد اس امید فعال ہونے کی کوشش میں ہے کہ شاید آصف زرداری ایک نسبتاً آسان ہدف ثابت ہوں

میاں شہباز شریف کے خیال میں نو برس پنجابی اسٹیبلشمنٹ سے دور رہنے کے بعد ان کے لیے اپنے صوبے کو پہچاننا بھی مشکل ہو رہا ہے۔ ضلعی حکومتوں کے نظام اور گجرات کے چودھریوں کی مبینہ اقربا پروری نے پنجابی بیوروکریسی کا تیا پانچا کر ڈالا ہے۔ میاں شہباز شریف کے بارے میں مشہور ہے کہ وہ روز اٹھارہ گھنٹے کام کرتے ہیں لیکن اس رفتار سے بھی ان کے خیال میں انہیں پنجاب کو مکمل طور پر اپنی گرفت میں لینے کے لیے کم از کم دو سال چاہئیں۔

اس دوران اگر وفاقی حکومت ٹوٹ جاتی ہے تو اقتدار پاکستان پیپلز پارٹی کے ہاتھ سے تو جائے گا ہی لیکن کوئی ضروری نہیں کہ وہ مسلم لیگ نواز کے ہاتھ ہی آئے۔ میاں شہباز شریف کے خیال میں ایسی صورت میں عین ممکن ہے کہ فوجی قیادت پھر سیاسی مہم جوئی کی لالچ میں آ جائے۔

لیکن اگر اس سوچ پر مسلم لیگ نواز متفق ہوتی تو حالیہ ضمنی انتخابات میں جنوبی پنجاب میں پاکستان پیپلز پارٹی کے مخالف آزاد امیدواروں کی حمایت نہ کرتی۔ ضمنی انتخابات سے پہلے دونوں جماعتیں یہ طے کر چکی تھیں کے وہ اٹھارہ فروری کے انتخابات میں ایک دوسرے کی جیتی ہوئی سیٹیں برقرار رکھیں گی۔ لیکن ضمنی انتخابات میں مسلم لیگ نواز کے کردار نے دونوں حلیفوں کے بیچ رفتہ رفتہ بڑھتی بداعتمادی کو مزید ہوا دی ہے۔

بدگمانی اور بداعتمادی کی اس فضا کو صاف کرنے کی بجائے آصف علی زرداری اور میاں نواز شریف کی شخصی سیاست نے اسے اور بھی پیچیدہ بنا دیا ہے۔

	آصف زرداری آئینی اصلاحات سے کہیں زیادہ پاکستان سے باہر مختلف ممالک کی سیاسی جماعتوں سے اپنی جماعت کے رابطے بڑھانے پر توجہ دے رہے ہیں

اپنے بڑے بھائی کی یہ سوچ میاں شہباز شریف اور کئی دیگر پارٹی رہنماؤں کے لیے پریشانی کا باعث اس لیے بنی ہوئی ہے کہ اس سوچ میں سیاسی سودے بازی کی جگہ محدود ہو جاتی ہے جو شاید پاکستان جیسے ملک میں اقتدار میں رہنے کے لیے ضروری ہے۔ شاید اسی لیے صدر مشرف کے مستقبل کے معاملے پر مسلم لیگ کی قیادت میں ایسی ہم آہنگی نظر نہیں آتی جیسی کے دوسرے تمام معاملات میں واضح ہے۔

اگر شہباز شریف کا بس چلے تو وہ کم از کم دو سال کے لیے ہر طرح کی محاذ آرائی سے دور صرف اور صرف پنجاب پر اپنی گرفت مضبوط کرنے پر توجہ دیں۔ وکلاء کی لانگ مارچ کا انجام دیکھ کر لگتا یوں ہے کہ فی الحال میاں شہباز شریف اپنی بات منوانے میں کامیاب ہو گئے ہیں۔ شاید اسی لیے مسلم لیگ نواز نے راولپنڈی کے علاوہ صوبہ بھر میں کہیں بھی اپنی مقامی قیادت کو لانگ مارچ کی حمایت میں متحرک ہونے کا نہیں کہا۔ لیکن میاں شہباز شریف سمیت کوئی بھی وثوق سے نہیں کہہ سکتا کہ کل کو اگر میاں نواز شریف کو وفاق یا پنجاب میں بھی حکومت چھوڑنے سے عوام میں مزید مقبولیت ملتی ہو تو ان کا فیصلہ کیا ہو گا۔

کچھ ایسا ہی سوالیہ نشان آصف علی زرداری کی سیاست پر بھی لگا ہے۔

حادثاتی طور پر ملک کی ایک بڑی سیاسی جماعت کے لیڈر بننے کے بعد سے لے کر اب تک آصف علی زرداری ایک چومکھی لڑائی میں پھنسے نظر آتے ہیں۔ ایک طرف تو انہیں صدر مشرف اور ان کی حمایتی فوج کا سامنا ہے تو دوسری طرف اپنی سب سے اہم اتحادی جماعت کے مشرف مخالف موقف کا۔ اس کے ساتھ ہی انہیں اپنی جماعت کے اندر سے اٹھنے والی سازشوں کو بھی سنبھالنا ہے اور وفاق کی منہ زور بیوروکریسی کو بھی۔

	شہباز شریف دو سال تک ہر طرح کی محاذ آرائی سے دور رہ کر پنجاب پر اپنی گرفت مضبوط کرنے پر توجہ دینے کے خواہاں ہیں

بیوروکریسی کی مدد سے پھیلائی جانے والی افواہوں میں آجکل سب سے بڑی افواہ یہ ہے کہ پاکستان پیپلز پارٹی کے اپنے تخمینوں کے مطابق موجودہ حکومت تین سے چار ماہ کی مہمان ہے۔

ایسی صورتحال میں بظاہر تو آصف علی زرداری کی تمام تر توجہ اس آئینی اصلاحاتی پیکیج پر ہونی چاہیے تھی جس کے بل بوتے پر وہ نظام کی تبدیلی کا دعویٰ کرتے ہیں۔ لیکن آصف زرداری نے اب تک آئینی اصلاحات سے کہیں زیادہ پاکستان سے باہر مختلف ممالک کی سیاسی جماعتوں سے اپنی جماعت کے رابطے بڑھانے پر زور دیا ہے۔ وہ واضح طور پر پاکستان پیپلز پارٹی کو دنیا بھر میں ایک ایسی جماعت کے طور پر منوانا چاہتے ہیں جو پاکستان میں جمہوریت، آزادی اور جدیدیت کی واحد ضمانت سمجھی جائے۔

اسی لیے انہوں نے اپنی تمام تر مشکلات و مصروفیات کے باوجود نہ صرف سوشلسٹ انٹرنیشنل کا اجلاس اسلام آباد میں کرایا بلکہ پھر ایتھنز جا کر اس کے نائب صدر بھی منتخب ہوئے۔ کچھ مبصرین کی رائے میں آصف زرداری کے ان اقدامات میں ایک بین الاقوامی سیاسی انشورنس پالیسی کی تلاش نظر آتی ہے جو زوال کے دور میں ان کی جماعت کی مدد کو آ سکے۔

سوشلسٹ انٹرنیشنل کی ایک سو ساٹھ ممبر سیاسی جماعتوں میں سے ساٹھ جماعتیں اس وقت مختلف ممالک کی حکومتیں چلا رہی ہیں۔ ایسے اداروں سے سیاسی روابط بڑھانا پاکستان پیپلز پارٹی کی اس نئی سوچ کا حصہ ہے جس کے تحت بینظیر بھٹو نے بھی اپنے آخری سال میں غیر ملکی ریاستی طاقتوں سے زیادہ غیر ملکی سیاسی قوتوں سے گٹھ جوڑ پیدا کرنے پر زور دیا تھا۔

لیکن کیا ایسا کرنا واقعی آصف زرداری اور پاکستان پیپلز پارٹی کے لیے سودمند ثابت ہو سکے گا؟ شاید نہیں، اور ایک سطح پر آصف زرداری اور میاں نواز شریف دونوں جانتے ہیں کہ وہ تخت یا تختہ والی صورتحال سے دوچار ہیں۔ ایک طرف تو عوام ہیں کہ صدر مشرف کے آٹھ سالہ دور کی یاد تک بھلا دینا چاہتے ہیں۔ اور دوسری طرف یہ دونوں سیاسی رہنما جو اچھی طرح جانتے ہیں کہ جب تک واشنگٹن میں بش انتظامیہ موجود ہے، صدر مشرف کے مواخذے کے طرف کوئی بھی قدم نئے خطرات کو جنم دے سکتا ہے جن میں شاید سب سے بڑا خطرہ پاکستان کے قبائلی علاقوں میں بھرپور امریکی حملوں کا ہے۔

ایسی صورتحال میں آصف زرداری کی چومکھی لڑائی اور میاں نواز شریف کی صدر مخالف خواہشات کے بیچ اگر کوئی باہمی مفاد کا رستہ ہے تو وہ صرف یہ کہ یہ دونوں رہنما سب کچھ بھلا کر صرف اور صرف حکومتی اور انتظامی امور پر توجہ دیں۔ اگر عوام کا اپنی سیاسی قیادت پر متزلزل اعتماد بحال ہو جاتا ہے تو پھر یہ صدر مشرف کے مواخذے یا معزول ججوں کی بحالی سے کہیں زیادہ بڑی فتح ہو گی۔