احمدرضا بی بی سی اردو ڈاٹ کام، کراچی

	بینظیر بھٹو کی ہلاکت کی خبر کے بعد ملک بھر سے احتجاج کی خبریں ملیں

پورے شہر میں خوف و دہشت کی فضاء ہے۔ سڑکوں پر بھگدڑ ہے اور ٹریفک بھی بے ہنگم ہوگیا ہے۔ سڑکیں جو یکطرفہ ٹریفک کے لیے ہیں وہاں دونوں اطراف سے گاڑیاں آجانے سے صدر سمیت کئی علاقوں میں بدترین ٹریفک جام ہے جبکہ ٹرانسپورٹ گاڑیاں بھی غائب ہوگئی ہیں جس کی وجہ سے سینکڑوں لوگ کئی علاقوں میں پھنس گئے ہیں۔

دوسری طرف شہر کے کئی علاقوں میں ہنگامے پھوٹ پڑے ہیں۔ لیاری، کھارادر، سلاوٹ پاڑے، گرومندر، ڈیفنس، کلفٹن، گلشن اقبال اور گلشن حدید سمیت دیگر کئی علاقوں میں ہوائی فائرنگ ہورہی ہے۔ مشتعل لوگوں کے ہجوم سڑکوں پر نکلے ہوئے ہیں جو دیوانہ وار نعرے لگارہے ہیں۔ پتھراؤ کررہے ہیں اور ٹائروں کو آگ لگارہے ہیں۔

سب سے جذباتی منظر لیاری میں ہے جو جہاں خواتین بھی سڑکوں پر نکل کر سینہ کوبی اور بین کررہی ہیں۔

ملک کے سب سے بڑے شہر میں جابجا ایسی افراتفری ہے جیسے عام طور پر زلزلے یا کسی دوسری قدرتی آف کے بعد نظر آتی ہے۔

شہر کے تشدد زدہ علاقوں سے یہ اطلاعات بھی موصول ہورہی ہیں کہ مشتعل لوگ سرکاری املاک اور گاڑیوں پر پتھراؤ کررہے ہیں اور انہوں نے بعض گاڑیوں کو بھی نذر آتش کردیا ہے۔