پاکستان نے جب افغانستان میں طالبان حکومت کو تسلیم کیا اس وقت نواز شریف وزیر اعظم تھے

خبر رساں ایجنسی اے پی سے بات کرتے ہوئے نواز شریف نے کہا کہ ’ میں ہمیشہ سے ہر قسم کی دہشت گردی کی مذمت کرتا رہا ہوں، چاہے وہ پاکستان میں ہو، یا ملک سے باہر۔

’ہم صرف اور صرف اعتدال پسندی کے راستے پر چلتے ہیں۔‘

نواز شریف نے کہا کہ ’ ہمارے بارے میں دوسرے ملک ماضی میں ہمارے تعاون کو مد نظر رکھے بغیر بیانات دیتے ہیں۔ یہ بات بالکل نامناسب ہے جس پر مجھے مایوسی ہے‘۔

افغانستان میں طالبان کی حکومت کو پاکستان نے نواز شریف کے دور اقتدار میں ہی تسلیم کیا تھا۔ طالبان کو تسلیم کرنے والے باقی دو ملک سعودی عرب اور متحدہ عرب امارات تھے۔

نواز شریف کی مسلم لیگ پر بعض حلقوں کی طرف سے پاکستان میں امریکہ مخالف جذبات کا فائدہ اٹھانے کا بھی الزام لگایا جاتا ہے۔

ہمارے بارے میں دوسرے ملک ماضی میں ہمارے تعاون کو مد نظر رکھے بغیر بیانات دیتے ہیں۔ یہ بات بالکل نامناسب ہے جس پر مجھے مایوسی ہے نواز شریف

انیس سو اٹھانے میں پاکستان نے جب ہندوستان کے جواب میں اپنے جوہری دھماکے کیے تھے، تو ملک میں اس کی ستائش کی گئی تھی لیکن مغربی دنیا میں بے چینی کی لہر دوڑ گئی تھی۔ انہیں خطرہ تھا کہ اسلامی بنیاد پرستوں سے نواز شریف کے مبینہ قریبی مراسم کی وجہ سے یہ جوہری ہتھیار مذہبی شدت پسندوں کے ہاتھوں میں پڑ سکتے ہیں۔

نواز شریف آج بھی کہتے ہیں کہ انہوں نے کبھی امریکہ کے سامنے گھٹنے نہیں ٹیکے حالانکہ ان پر جوہری دھماکے کرنے کے لیے زبردست دباؤ تھا۔

اس وقت ٹامس سائمنس پاکستان میں امریکہ کے سفیر تھے جنہوں نے نواز شریف کو جوہری آزمائشی دھماکے کرنے سے روکنے کے لیے امریکہ کی جانب سے رعایتوں کے پیکج کی پیش کش کی تھی۔

’اس وقت زیادہ تر پاکستانی اس حق میں تھے کہ پاکستان آزمائشی دھماکہ کرے۔ لیکن نواز شریف اس کے خلاف تھے۔ ان کا مقصد امریکہ کو ٹھینگا دکھانا نہیں تھا بلکہ وہ صرف اپنا عہدہ بچا رہے تھے۔ ان کے سامنے اور کوئی راستہ نہیں تھا‘۔