اعجاز مہر بی بی سی اردو ڈاٹ کام، اسلام آباد

	ملک بھر میں گزشتہ روز سے صدر جنرل پرویز مشرف کی حراست کی افواہیں چل رہی ہیں

بی بی سی سے بات کرتے ہوئے انہوں نے کہا کہ پاکستان میں افواہیں زیادہ ہوتی ہیں جبکہ حقائق اس کے برعکس ہوتے ہیں۔

ملک بھر میں گزشتہ روز سے صدر جنرل پرویز مشرف کی حراست کی افواہیں چل رہی ہیں اور ان افواہوں میں پیر کے روز اس وقت شدت پیدا ہوگئی جب یہ کہا جانے لگا کہ گزشتہ چوبیس گھنٹے تک جنرل پرویز مشرف کی کوئی سرگرمی رپورٹ نہیں ہوئی۔

ایسی صورتحال میں ریاستی ٹی وی چینل جو صدر جنرل پرویز مشرف کی بیشتر سرگرمیاں براہ راست نشر کرتا ہے ، اس سے یہ خبر نشر ہوئی ہے کہ صدر نے پیر کو شریعت کورٹ کے چیف جسٹس حاذق الخیری اور تین ججوں فدا محمد خان، صلاح الدین اور ظفر یاسین کو ’پی سی او‘ کے تحت حلف دیا ہے۔

پی ٹی وی کے مطابق غیر ملکی سفارتکاروں نے بھی صدر سے ملاقات کی ہے اور انہیں صدر نے ایمرجنسی کے نفاذ کے بارے میں اعتماد میں لیا۔

صدر جنرل پرویز مشرف کی حراست کی افواہوں سے جہاں ملک کے سیاسی حلقوں میں بے چینی اور غیر یقینی صورتحال تھی وہاں سٹاک مارکیٹ بھی شدید بحران کا شکار ہوا اور انڈیکس 600 سے زیادہ پوائنٹس گر گئی ، جس وجہ سے سرمایہ کاروں کے اربوں روپے ڈوب گئے ہیں۔

صدر جنرل پرویز مشرف کی حراست کے بارے میں افواہوں میں تیزی کی ایک وجہ امریکی اور برطانوی وزراء خارجہ کے وہ بیانات بھی بتائے جاتے ہیں جس میں انہوں نے کہا ہے کہ اگر انتخابات وقت پر نہیں ہوئے تو وہ اربوں ڈالر کی امداد روک سکتے ہیں۔

صدر جنرل پرویز مشرف نے تین نومبر کو ملک میں دوسری بار آئین معطل کرکے ہنگامی حالات نافذ کرنے کا اعلان کیا تھا۔ جس کی سب سے بڑی وجہ عدلیہ کی انتظامیہ سے محاذ آرائی بتائی گئی تھی۔

سیکورٹی فورسز نے سپریم کورٹ اور ہائی کورٹ کے متعدد ایسے ججوں کو گھروں میں نظر بند کردیا ہے جو عبوری آئین کے تحت حلف اٹھانے سے انکاری ہیں۔

پیپلز پارٹی سمیت سیاسی جماعتیں ایمرجنسی کے نفاذ کی مذمت تو کر رہی ہیں لیکن ان کی جماعتوں کے کارکنوں کا ابھی تک کوئی بڑا احتجاج دیکھنے کو نہیں ملا۔

ایسے میں سابق وزیراعظم بینظیر بھٹو کا یہ بیان بھی سامنے آیا ہے کہ وہ ایمرجنسی کے باوجود بھی جنرل پرویز مشرف سے بات چیت جاری رکھیں گی۔

پاکستان میں اڑتالیس گھنٹے گزر جانے کے بعد بھی مقامی اور غیر ملکی نجی ٹی وی چینلز کی نشریات بند ہیں اور ان کی جگہ بھارت کے انٹرٹینمینٹ چینلز کی نشریات دکھائی جا رہی ہیں۔