عبادالحق بی بی سی اردو ڈاٹ کام ، لاہور

	بےنظیر بھٹو کے آبائی انتخابی حلقے میں بھی 2 لاکھ 51 ہزار ووٹر حذف کر دیےگیے ہیں

پیپلز پارٹی کے سینیٹر اور قانون سردار لطیف احمد خان کھوسہ کے توسط سے دائر کردہ اس درخواست میں چیف الیکشن کمیشن، وفاقی حکومت اور شاختی کارڈ جاری کرنے والے ادارے نادرا کے ڈائریکٹر جنرل کو فریق بنایا گیا ہے۔

درخواست میں استدعا کی گئی ہے کہ الیکشن کمیشن کو حتمی انتخابی فہرستوں کے اجراء سے روک دیا جائے۔

بی بی سی سے بات کرتے ہوئے لطیف کھوسہ نے کہا کہ درخواست میں کہا گیا کہ نئی انتخابی فہرستوں میں نادرا کے کمیپوٹرائزڈ شناختی کارڈ نہ ہونے کے وجہ سے دو کروڑ سے زائد اہل ووٹروں کے ناموں کا اندراج نہیں کیا گیا ۔

انہوں نے کہا کہ درخواست میں یہ نکتہ اٹھایا گیا ہے کہ ملک کے آئین میں کوئی ایسی شق نہیں ہے جس کے تحت ووٹ ڈالنے کے لیے شاختی کارڈ کی پابندی عائد کی جا سکے۔ آئین کے مطابق کوئی بھی شہری جس کی عمر اٹھارہ برس سے زیادہ ہو وہ ووٹ ڈالنے کا اہل ہے اس لیے اہل ووٹروں کے انتخابی فہرست میں ناموں کے اندراج کے لیے نادرا کے کمیپوٹرائزڈ شاختی کارڈز کی شرط کو ختم کیا جائے۔

درخواست میں یہ نکتہ اٹھایا گیا ہے کہ ملک کے آئین میں کوئی ایسی شق نہیں ہے جس کے تحت ووٹ ڈالنے کے لیے شاختی کارڈ کی پابندی عائد کی جا سکے۔ آئین کے مطابق کوئی بھی شہری جس کی عمر اٹھارہ برس سے زیادہ ہو وہ ووٹ ڈالنے کا اہل ہے

درخواست میں موقف اختیار کیا گیا ہے کہ سنہ دو ہزار دو میں ووٹروں کی تعداد سات کروڑ اٹھارہ لاکھ تھی جو اب آٹھ کروڑ بیس لاکھ ہونی چاہیے تھی جبکہ سردار لطیف کھوسہ کا کہنا ہے کہ دو کروڑ ستر لاکھ ووٹر کم کر دیےگئے ہیں۔

پٹیشن میں اس امر کی نشاندہی بھی کی گئی ہے کہ بےنظیر بھٹو کے آبائی انتخابی حلقے لاڑکانہ میں دو لاکھ اکیاون ہزار ووٹروں کو حذف کر دیا گیا ہے ۔

درخواست کے مطابق کسی اہل ووٹر کو انتخابی فہرست میں شامل نہ کرنا شہری کا بنیادی حق صلب کرنے بلکہ انتخابات سے قبل دھاندلی کے مترادف ہے۔

درخواست میں مطالبہ کیا گیا ہے کہ ملک میں اہل ووٹروں کو انتخابی فہرست میں شامل کیا جائے جس کے بعد یہ انتخابی فہرستیں بلامعاوضہ نہ صرف درخواست گزار اور دیگر سیاسی جماعتوں کو فراہم کی جائیں بلکہ الیکشن کمیشن کی ویب سائٹ پر ان فہرستوں کو جاری کیا جائے۔