ہارون رشید بی بی سی اردو ڈاٹ کام، میر علی

	ملا نذیر کا موقف تھا کہ غیرملکیوں کو قبائلی رسم و رواج کا پاس کرنا ہوگا۔

جنوبی وزیرستان میں طالبان ذرائع نے نام ظاہر نہ کرنے کی شرط پر بی بی سی کو بتایا کہ ان کی قیادت نے ملا نذیر احمد کے خلاف یہ اقدام ان کی ازبکوں کے خلاف اس سال مارچ میں کارروائی کی نتیجے میں اٹھایا اور اب ان کا اس تحریک سے کوئی تعلق نہیں ہے۔

وانا ایک معمہ

ملا نذیر احمد نے وانا کے مغرب میں مارچ میں کئی ہفتوں کی شدید لڑائی کے بعد اعظم ورسک، کلوشہ اور شین ورسک کے علاقوں سے سینکڑوں غیرملکیوں کو جن میں اکثریت ازبکوں کی بتائی جاتی ہے بیدخل کر دیا تھا۔

منصوبہ ساز طالبان ذرائع نے الزام لگایا ہے کہ غیرملکیوں کو بیدخل کرنے کا منصوبہ پاکستانی فوج نے تیار کیا تھا جس کا مقصد بظاہر مغربی ممالک کو خوش کرنا تھا۔

طالبان ذرائع نے الزام لگایا ہے کہ غیرملکیوں کو بیدخل کرنے کا منصوبہ پاکستانی فوج نے تیار کیا تھا جس کا مقصد بظاہر مغربی ممالک کو خوش کرنا تھا۔

بتیس سالہ ملا نذیر احمد کو گزشتہ برس طالبان قیادت نے ہی جنوبی وزیرستان میں امیر مقرر کیا تھا۔ لیکن اب طالبان ذرائع کا کہنا ہے کہ غیرملکیوں کی ہلاکت میں ملوث ہونے کی وجہ سے وہ ان کے لیئے ناقابل برداشت ہوچکے تھے۔

ملا نذیر سے گزشتہ دنوں ان کے اس لڑائی کے بعد طالبان سے روابط سے متعلق جب بی بی سی نے سوال کیا تھا تو انہوں نے اس کا جواب دینے سے انکار کر دیا تھا۔ البتہ ان کا کہنا تھا کہ افغانستان کے طالبان کا یہاں کے حالات سے کوئی تعلق نہیں۔

طالبان کے اس اقدام سے واضح ہے کہ ان میں غیرملکیوں کے خلاف کارروائی کے مسئلے پر اختلافات تھے۔ ملا نذیر کا کہنا ہے کہ ان کے پاس پاکستان کے علاوہ افغانستان کی بھی شہریت ہے اور وہ قندہار میں جائیداد کے مالک بھی ہیں۔

اب واضح نہیں کہ طالبان کے اس اعلان کے بعد ملا نذیر کی افغانستان آمد و رفت ممکن ہوسکے گی یا نہیں۔

ملا نذیر افغانستان کے طالبان کے ساتھ ماضی میں تخار اور قندوز کے علاقوں میں شمالی اتحاد کے خلاف جنگ میں حصہ لے چکے ہیں۔ تاہم ان کا موقف رہا ہے کہ انہوں نے کبھی اسامہ بن لادن، ملا محمد عمر یا کسی اور اہم القاعدہ رہنما سے ملاقات نہیں کی ہے۔

ملا نذیر سے وانا میں ٹیلفون کی خرابی کی وجہ سے رابطہ نہیں ہوسکا۔