اعجاز مہر بی بی سی اردو ڈاٹ کام، اسلام آباد

	دلاور خان کی رہائی کے لیے ملکی اور بین الاقوامی میڈیا نے اہم کردار ادا کیا

شکریہ: مگر کس کا

’ہم کچھ نہیں کہہ سکتے‘

دلاور خان وزیر نے بتایا کہ پیر کے روز جب وہ اسلامک یونیورسٹی کے ہاسٹل میں مقیم اپنے بھائی سے ملاقات کے بعد ڈیرہ اسماعیل خان جانے کے لیے پیر ودہائی کے بس اڈہ کے لیے ٹیکسی میں روانہ ہوئے تو انہیں سادہ کپڑوں میں ملبوس ’نامعلوم‘ افراد نے روک لیا۔

ان کے مطابق ان کی آنکھوں پر پٹیاں باندھ کر پولیس کے ہیڈ کوارٹر کے سامنے سے انہیں لاتیں اور مکے مارتے ہوئے گاڑی میں ڈالا گیا اور ایک نامعلوم مقام پر لے گئے۔ انہوں نے بتایا کہ اغوا کاروں ان سے صحافتی امور کے بارے میں سوالات کیئے کہ وہ باجوڑ کیسے پہنچے اور جنوبی وزیرستان سے خبریں کیسے حاصل کرتے ہیں۔

دلاور خان نے بتایا کہ ان سے مار پیٹ بھی کی گئی اور منگل کی شام کو انہیں اسلام آباد میں ایک جنگل میں چھوڑ دیا گیا۔ جہاں سے وہ لفٹ مانگ کر ٹیکسی سٹینڈ تک پہنچے اور وہاں سے وہ بی بی سی کے اسلام آباد دفتر آئے۔ انہیں جنگل سے دفتر پہنچنے میں بیس سے پچیس منٹ لگے۔

دلاور کی گمشدگی اور رہائی  دلاور خان وزیر کسی حکومتی ادارے کی تحویل میں نہیں تھے۔ وزیر مملکت برائے اطلاعات

ان کے مطابق اگر تمام میڈیا کے ادارے اپنے صحافیوں کے لیے ایسا احتجاج کریں تو شاید کسی صحافی کو کوئی خطرہ لاحق نہیں ہو۔ انہوں نے دعویٰ کیا کہ جس طرح اسلام آباد میں سخت سیکورٹی کے باوجود دن دیہاڑے پولیس ہیڈ کوارٹر کے سامنے سے دیدہ دلیری سے اغوا کیا گیا یہ کارروائی انہیں انٹیلی جنس ایجنسیز کی لگتی ہے۔

لیکن اس بارے میں وزیر اطلاعات محمد علی درانی کا کہنا ہے کہ دلاور خان وزیر کسی حکومتی ادارے کی تحویل میں نہیں تھے۔

دریں اثناء صحافیوں کی مقامی تنظیم ’آر آئی یو جے‘ کی اپیل پر صحافیوں نے منگل کی شام گئے پارلیمان کے ایوان بالا یعنی سینیٹ کی پریس گیلری سے بائیکاٹ کیا۔

اس دوران حزب مخالف کے رہنما رضا ربانی نے ایوان کی توجہ دلائی کہ دو روز سے بی بی سی اور روزنامہ ڈان کے نمائندہ دلاور خان وزیر کو اسلام آباد میں سخت سیکورٹی کے باوجود اغوا کیا گیا ہے اور حکومت کوئی جواب نہیں دے رہی۔

اس پر وزیر اطلاعات محمد علی درانی نے کہا کہ وہ بدھ کو دلاور خان کے متعلق ایوان میں رپورٹ پیش کریں گے کہ حقائق کیا ہیں۔ وزیر کو چیئرمین سینیٹ نے کہا کہ وہ صحافیوں کے پاس جائیں اور انہیں اعتماد میں لیں۔ لیکن وہ صحافیوں کے پاس نہیں آئے۔

صحافیوں کے ایک سرکردہ مرکزی رہنما سی آر شمسی اور مقامی تنظیم کے سیکریٹری جنرل طارق عثمانی نے حکومت کی مذمت کرتے ہوئے بدھ کے روز بھی ایوان کی گیلری سے بائیکاٹ جاری رکھنے اور پارلیمان کے سامنے مظاہرہ کرنے کا اعلان کیا۔

دن بھر مختلف وزراء اور پولیس حکام سے رابطہ کیا جاتا رہا لیکن شام گئے تک انہوں نے دلاور خان وزیر کے بارے میں کچھ نہیں بتایا۔ تحقیقات کرنے والے ڈی ایس پی جمیل ہاشمی نے کہا کہ نامعلوم اغوا کاروں کے خلاف مقدمہ درج تو کیا گیا ہے لیکن کوئی پیش رفت نہیں ہوئی۔