سائرہ امین کا تعلق 117 جی ڈی پی کورس سے ہے

پی اے ایف اکیڈمی رسالپور میں جمعے کے روز ہونے والی پاسنگ آؤٹ پریڈ میں ایوی ایشن کیڈٹ سائرہ امین نے اعزازی تلوار کے علاوہ بہترین تعلیمی کاکردگی پر اصغر حسین ٹرافی بھی جیتی جبکہ بہترین پائلٹ کی ٹرافی سینئر انڈر آفیسر نادر علی نے حاصل کی۔

سائرہ امین کا تعلق 117 جی ڈی پی کورس سے ہے جس میں ان سمیت تین خواتین نے کامیابی سے تربیت مکمل کرنے کے بعد فضائیہ میں کمیشن حاصل کیا ہے۔ پی اے ایف کے ایک ترجمان کے مطابق ان خواتین کیڈٹس نے تربیت کے ہر مرحلے میں اپنے مرد ساتھیوں کا جم کر مقابلہ کیا اور سائرہ کی کامیابی اس کھلے مقابلے کی وجہ سے ہی زیادہ اہم ہے۔

اس سے پہلے پاس آؤٹ ہونے والے کورس میں پہلی مرتبہ چار خواتین ہواباز شامل تھیں جو کمیشن پانے کے بعد آجکل فائٹر کنورشن کورس کر رہی ہیں۔

افواج پاکستان میں خواتین کی شمولیت روایتی طور پر میڈیکل کور تک محدود رہی ہے۔ لڑاکا سپاہ کی صف میں عورتوں کو شامل کرنے میں فضائیہ نے نہ صرف پہل کی ہے بلکہ تینوں افواج میں ابھی تک یہ اپنی نوعیت کا واحد اقدام ہے۔