ریاض سہیل بی بی سی اردو ڈاٹ کام، کراچی

	اساتذہ تنظیموں کی جانب سے احتجاج تین روز سے جاری ہے

محکمہ تعلیم کی طرف سے گزشتہ دنوں ایک حکم نامے کے ذریعے اساتذہ کو متنبہ کیا گیا تھا کہ اگر محکمے کا کوئی ملازم یا استاد یونین سازی کی سرگرمیوں میں ملوث پایا گیا تو اس کے خلاف ملازمتوں کے برطرفی کے آرڈیننس کے تحت کارروائی کی جائےگی۔

حکومت کے اس فیصلے کے خلاف سندھ میں گزشتہ تین روز سے اساتذہ کی تنظیموں کی جانب سے احتجاج جاری ہے۔ اس دوران تحصیل ہیڈ کوآرٹرز سے لے کر چھوٹے بڑے شہروں میں مظاہرے اور بھوک ہڑتالیں کی گئی ہیں۔

تنظیموں پر پابندی کے حکم نامے میں کہا گیا ہے کہ کھاتے میں کام کرنے والے ملازمین نے غیرقانونی طریقے سے تنظیمیں بنائی تھیں جو غیر قانونی ہونے کے علاوہ ہڑتال اور دیگر سماج دشمن سرگرمیوں میں ملوث تھیں جس سے تعلیمی ماحول خراب ہورہا تھا ۔

صوبائی وزیر تعلیم حمیدہ کھوڑو کا کہنا ہے کہ ان تنظیموں پر سوچ بچار کے بعد پابندی عائد کی گئی ہے۔

ان کے مطابق یہ تاثر درست ہے کہ سندھ میں تعلیم زوال پذیر ہے جس میں ان یونین اور ایسوسی ایشنوں کا بھی کردار ہے۔’ان تنظیموں اور ان کے رہنماؤں نے اپنی تعلیم دشمن سرگرمیوں کے ذریعے پورے نظام تعلیم کو مفلوج کر دیا ہے‘۔

اساتذہ تنظیموں کے اتحاد سندھ ایمپلائزالائنس کے چئرمین محمد رفیق جروار نے اعلان کیا ہے کہ جب تک حکومت اپنے فیصلے سے دستبردار نہیں ہوگی احتجاج جاری رہےگا۔

	احتجاج کے دوسرے مرحلے میں جیل بھرو تحریک کا اعلان کیا جائے گا

انہوں نے بتایا کہ پہلے مرحلے میں احتجاجی مظاہرے اور بھوک ہڑتالوں سمیت سرکاری دفاتر کا گھیراؤ کیا جائےگا جبکہ دوسرے مرحلے میں جیل بھرو تحریک کا اعلان کیا جائےگا۔

واضح رہے کہ سندھ میں ایک لاکھ تیس ہزار پرائمری، بیس ہزار سے زائد سیکنڈری اور ساڑے سات ہزار کالج اساتذہ ہیں۔

ان اساتذہ سے درس اور تدریس کے علاوہ انتخابات میں بھی ڈیوٹی لی جاتی ہے اس وقت جب ووٹر لسٹوں میں اندراج کا مرحلہ جاری ہے۔ اس فیصلے سے حکومت کو دشواری کا سامنا کرنا پڑے گا۔

انسانی حقوق کمیشن اور سندھ بار کونسل نے بھی حکومت کے اس قدم کو بنیادی انسانی حقوق اور آئین کے منافی قرار دیا ہے۔