مبشر زیدی بی بی سی اردو ڈاٹ کام، اسلام آباد

	ایران کے نائب صدر پرویز داؤدی تیسرے ایرانی لیڈر ہیں جو پاکستان آئے ہیں۔(فائل فوٹو)

ایرانی نائب صدر کا یہ بھی کہنا تھا کہ جوہری ہتھیار رکھنا ایران کے مذہب اور ایمان کے تحت ممنوع ہے۔

اسلام آباد میں دونوں رہنماؤں نے پاکستان اور ایران کے درمیان ترجیحی تجارتی محصولات اور کسٹمز کے شعبے میں تعاون کے بارے میں دو مفاہمتی یادواشتوں پر دستخط کے بعد پریس کانفرنس میں کہا کہ انہوں نے ایران پاکستان بھارت گیس پائپ لائن منصوبے اور دونوں ممالک کے درمیان تجارت بڑھانے کے بارے میں مذاکرات کئے ہیں۔

پاکستانی وزیر اعظم کا کہنا تھا کہ گیس پائپ لائن منصوبے میں گیس کے نرخوں پر ابھی کچھ اختلافات باقی ہیں جو جلد ہی دور کر لئے جائیں گے۔ جبکہ ایرانی نائب صدر کا کہنا تھا کہ ایران اس منصوبے کو جلد عملی جامہ پہنانے کے حق میں ہے اور اس سے خطے میں پاکستان،ایران اور بھارت کے تعلقات کو مزید فروغ ملے گا۔

ایران کے جوہری تنازعے کے بارے میں پاکستان کے وزیر اعظم شوکت عزیز کا کہنا تھا کہ پاکستان نے ہمیشہ جوہری توانائی کے پر امن استعمال کی حمایت کی ہے اور وہ امید کرتے ہیں کہ ایران کا جوہری تنازعہ پر امن طریقے سے بات چیت اور سفارتی ذرائع کے ذریعے حل کر لیا جائے گا۔

ایرانی نائب صدر نے کہا کہ وہ پاکستان کی طرف سے ایران کے جوہری تنازعے پر پاکستان کے موقف کی تعریف کرتا ہے کہ اس نے اس مسئلے پر دانشمندانہ موقف اپنایا ہے۔

انہوں نے کہا کہ پر امن جوہری توانائی کا حصول ہر ملک کا حق ہے اور اس پر کوئی سمجھوتا نہیں کیا جا سکتا۔ایرانی نائب صدر نے مذید کہا کہ اس بات کی یقین دہانی کروانے کے لئے کہ ایران کا جوہری پروگرام پر امن مقاصد کے لئے ہے ایران بین الاقوامی برادری کے ساتھ اس مسئلے پر بات چیت جاری رکھنے کے لئے تیار ہے۔

انھوں نے کہا کہ پوری دنیا میں صرف دو تین ایسے ممالک ہیں جو ایران کے پر امن جوہری پروگرام کے مخالف ہیں اور ان کے ذہن میں یہ بات بیٹھ چکی ہے کہ صرف ان ہی کو اس بات کا حق حاصل ہے کہ وہ جوہری ٹیکنالوجی حاصل کرسکتے ہیں اور کسی دوسرے ملک کو یہ حق نہیں ہے۔