ذوالفقار علی بی بی سی ، اردو ڈاٹ کام ، مظفرآباد

	اپریل کے وسط میں بعض تنظیموں کو ایل او سی کے قریب پرواز کی اجازت نہیں دی گئی

یہ تجویز اس وقت دی گئی جب اقوام متحدہ کے کہنے کے مطابق حکومت پاکستان نے اقوام متحدہ سمیت کچھ تنظیموں کو لائن آف کنڑول کے قریب پرواز کی اجازت نہیں دی۔ زلزلے کے بعد یہ پہلی مرتبہ ہے کہ حکومت پاکستان نے امدادی کاموں میں مصروف عالمی اداروں کو لائن آف کنڑول کے قریب پرواز کرنے سے روک دیا ہے۔

پاکستان میں اقوام متحدہ کی ایک خاتون اہلکار رانیا دگاش نے بی بی سی کو بتایا کہ حکومت پاکستان کی طرف سے اس ماہ کے وسط میں بعض عالمی تنظیموں کو لائن آف کنڑول کے قریب پرواز کرنے کی اجازت نہیں دی گئی۔ ان کا کہنا تھا کہ اس کی وجہ یہ معلوم ہوتی ہے کہ کچھ امدادی پروازوں نے مبینہ طور پر غلطی سے لائن آف کنڑول کی خلاف ورزی کی اور ہندوستان کی حکومت نے پاکستان کی حکومت سے اس کی شکایت کی ہے۔

بظاہر یہی لگتا ہے کہ ہندوستان کی شکایت کے بعد حکومت پاکستان نے یہ اقدام اٹھایا ہے اور اس صورتحال کے بعد اقوام متحدہ کی اہلکار رانیا کا کہنا ہے کہ مستقبل میں کسی پریشانی سے بچنے کے لیئے انھوں نے حکومت پاکستان کو یہ تجویز دی ہے کہ وہ لائن آف کنڑول کے پانچ کلومیڑ کے علاقے میں پرواز نہیں کریں گے۔ لیکن ابھی یہ معلوم نہیں کہ آیا حکومت پاکستان کو اقوام متحدہ کی تجویز سے اتفاق ہے یا نہیں۔

زلزے کے بعد کی صورتحال پر اقوام متحدہ کی ماہانہ رپورٹ میں کہا گیا ہے کہ اس کی وجہ سے امدادی کاموں میں برا اثر پڑ رہا ہے کیوں کہ ان علاقوں کا بذریعہ سڑک رابطہ نہیں ہے ۔ یہ رپورٹ گزشتہ ہفتے شائع ہوئی تھی۔

زلزے کے بعد کی صورتحال پر اقوام متحدہ کی ماہانہ رپورٹ میں کہا گیا ہے کہ اس کی وجہ سے امدادی کاموں پر برا اثر پڑ رہا ہے کیونکہ ان علاقوں کا بذریعہ سڑک رابطہ نہیں ہے ۔ یہ رپورٹ گزشتہ ہفتے شائع ہوئی تھی۔

آٹھ اکتوبر کے زلزے کے بعد ہزاروں کی تعداد میں غیرملکی امدادی کارکن ، فوجیوں اور صحافیوں نے اس علاقے کا رخ کیا۔ اقوام متحدہ کےاداروں سمیت درجنوں غیر ملکی امدادی اداروں کے کارکن لائن آف کنڑول کے قریبی علاقوں سمیت متاثرہ علاقوں میں ہر جگہ کام کررہے ہیں اور امدادی ہیلی کاپٹروں اور طیاروں کے لائن آف کنڑول کے قریبی علاقوں میں پرواز کرنے پر کوئی پابندی نہیں تھی لیکن یہ زلزے کے بعد پہلی مرتبہ ہے کہ اس طرح کی پابندی عائد کی گئی ہے۔

زلزے سے پہلے کوئی بھی غیر ملکی حکومت پاکستان سے اجازت نامہ حاصل کیئے بغیر کشمیر کے اس علاقے میں داخل نہیں ہو سکتا تھا اور لائن آف کنڑول کے دس کلومیڑ کے علاقے میں کوئی بھی غیر ملکی نہیں جاسکتا تھا لیکن آٹھ اکتوبر کے بعد حکومت پاکستان نے یہ پابندیاں نرم کردیں تھیں۔ ابھی یہ نہیں معلوم کہ حکومت پاکستان ان پابندیوں کو مستقل طور پر اٹھانا چاہتی ہے یا نہیں۔