باجوڑ میں ہلاکتوں کے خلاف احتجاجی جلوس نکالا گیا

’باجوڑ ایجنسی میں ہیڈکوارٹر خار سے بیس کلومیٹر کے فاصلے پر واقع گاؤں ڈمہ ڈولا میں اٹھارہ افراد کی ہلاکت پر لوگوں میں شدید اشتعال پایا جاتا ہے۔

باجوڑ میں حملہ کے مقام پر تین مکانوں کا ملبہ اور مرے ہوئے مویشی پڑے ہوئے نظر آ رہے ہیں اور لوگ بڑی تعداد میں جائے وقوعہ پر آ رہے ہیں تاکہ اصل واقعات اور حالات کا پتہ چل سکے۔

مقامی حکام اس وقت تک سولہ افراد کی ہلاکت کی تصدیق کر رہے ہیں جبکہ لوگوں کا کہنا ہے کہ مرنے والوں کی تعداد اٹھارہ ہے۔

تباہ ہونے والے مکانات کے قریب ہی ایک کھیت میں تیرہ تازہ قبریں دیکھی جا سکتی ہیں جبکہ باقی پانچ قبروں کے بارے میں مقامی لوگوں کا کہنا ہے کہ انہیں تدفین کے لیے ان کے آبائی دیہاتوں میں لے جایا گیا ہے۔

مرنے والے زیادہ تر لوگ اور ان کے لواحقین زرگر ہیں اور ان کا خار کے بازار میں سونے کا کاروبار ہے۔ اس کے علاوہ ان کا ذریعہ معاش چھوٹے پیمانے پر کھیتی باڑی بھی ہے۔

ان لوگوں کا کہنا ہے کہ وہ اس جگہ پر بارہ برس سے رہائش پذیر ہیں اور وہ نہ تو افغانی ہیں اور نہ ہی ان کی افغانستان میں کوئی رشتہ داری ہے۔ انہوں نے کہا کہ ان کا القاعدہ سے کسی قسم کا کوئی تعلق نہیں ہے۔

مقامی لوگوں نے بتایا کہ حملے کے دن نہ تو ان کے علاقے میں کوئی افغانی موجود تھا اور نہ ہی کوئی مہمان آیا ہوا تھا۔ ان کا کہنا ہے کہ اس علاقے میں ایمن الظواہری سمیت کوئی بھی غیر ملکی شہری موجود نہیں ہے۔

حکام کا کہنا ہے کہ وہ ابھی تک اس واقعے کی تفتیش کر رہے ہیں کہ آیا یہ واقعہ کسی حملے کا نتیجہ ہے یا ان گھروں میں پہلے سے موجود بارود پھٹا ہے۔ ان حالات میں باجوڑ ایجنسی میں لیویز کی ایک بڑی تعداد تعینات کی گئی ہے۔

علاقے میں ان ہلاکتوں کے خلاف شدید غم و غصہ ہے اور سینچر کے روز مذہبی جماعتوں نے اس واقعے کے خلاف احتجاجی جلسہ بھی منعقد کیا ہے۔

اس موقع پر مظاہرین نے سی ڈیز فروخت کرنے والی دکانوں پر پتھراؤ کیا اور امریکی امداد سے چلنے والی ایک غیر سرکاری تنظیم کے دفتر کو آگ لگا دی۔ مظاہرین اس دفتر کا سامان بھی اپنے ساتھ لے گئے۔

ماضی میں اس علاقے میں تحریک نفاذ شریعت محمدی کا بہت مضبوط تھی تاہم گیارہ ستمبر کے بعد حالات تبدیل ہو چکے ہیں۔

یہ علاقہ سوات اور دیگر جگہوں سے افغانستان جانے کے لیے ایک گزرگاہ کی حیثیت رکھتا ہے اور یہاں سے افغانستان کے برف پوش پہاڑ سامنے دکھائی دیتے ہیں۔

علاقے کے زیادہ تر خاندانوں کے افراد کراچی میں محنت مزدوری کرتے ہیں اور باقی لوگ معمولی کاروبار اور کھیتی باڑی کر کے اپنا پیٹ پالتے ہیں‘۔