ذوالفقار علی بی بی سی اردو ڈاٹ کام، مظفرآْباد

	کیرن ہیوز صحافیوں سے بات کرتے ہوئے

اس دورے کا مقصد مزید امداد کی ضرورت کا براہ راست جائزہ لینا تھا۔

اس وفد کے مظفرآباد جانے کا فیصلہ امریکہ کے صدر جارج ڈبلیو جارج بش نے کیا تھا تا کہ جس بڑے پیمانے پر تباہی پھیلی ہےاس کے بارے میں بہتر آگاہی پیدا ہو اور اس بات کا بھی جائزہ لیا جا سکے کہ رہائش، خوراک، صحت، صفائی اور علاج معالجے کی ضروریات کتنی شدید ہیں۔

اس وفد میں امریکہ کی عوامی سفارت کاری اور تعلقات عامہ کی انڈر سیکریڑی کیرن ہیوز کے علاوہ تین ممتاز کاروباری شخصیات بھی شامل تھیں۔

کیرن ہیوز نے مظفرآباد میں صحافیوں سے گفتگو کرتے ہوئے کہا کہ امریکہ عالمی برادری کے ساتھ مل کر تندہی سے کام کر رہا ہے۔ انہوں نے کہا کہ ’ ہم پاکستان کو دی جانے والی امداد کے سب سے بڑے حصہ دار ہیں اور یہ کہ ورلڈ فوڈ پروگرام ، ورلڈ بنک اور دیگر ایـجینسیز کی امداد میں بھی ہمارا حصہ سب سے زیادہ ہے‘۔

	کیرن ہیوز نے فیلڈ ہسپتال کا دورہ بھی کیا

امریکی وفد نے مظفرآباد شہر کے قریب لڑکیوں کے تباہ ہونے والے ایک ہائی اسکول کا بھی دورہ کیا۔ اس اسکول کی چوراسی طالبات زلزلے میں ہلاک ہوگئی تھیں۔ اب یہ اسکول یو ایس ایڈ کی طرف سے فراہم کیے جانے والے دو بڑے خیموں میں قائم کیا گیا ہے۔اس کے علاہ یہ وفد مظفرآباد شہر میں قائم امریکی فیلڈ ہسپتال میں بھی گیا جہاں انہوں نے ادویات کا عطیہ بھی دیا۔

امریکی حکومت نے زلزلے کے متاثرہ علاقوں میں امداد اور تعمیر نو کے لیے ایک سو چھپن ملین ڈالر مختص کیے ہیں لیکن زلزلہ متاثرین کے لیے امریکہ کے نجی شعبے کی طرف سے امداد سونامی کے مقابلے میں بہت کم ہے۔

اب تک ایک اندازے کے مطابق امریکی اداروں نے زلزلہ متاثرین کے لیے ستر ملین ڈالر کی امداد دی ہے جبکہ سونامی کے متاثرین کے لیے انہی اداروں کی طرف سے اب تک دی جانے والی امداد ڈیڑھ بلین ڈالر ہے ۔