علی سلمان بی بی سی اردو ڈاٹ کام لاہور

	پولیس نے دھماکے میں میبنہ طور پر ملوث حملہ آوور کا تصویری خاکہ بھی جاری کیا تھا

لاہور میں جمعرات کو اچھرہ اور لاری اڈہ میں دو الگ الگ دھماکوں میں سات افراد ہلاک ہوۓ تھے اور دو درجن کے قریب زخمی تھے۔

ان زخمیوں کو لاہور کے سروسز ہسپتال میں داخل کرادیا گیا تھا جہاں کل رات ایک زخمی بچہ سلیم اللہ ہلاک ہوگیا اور اتوار کو رکشہ ڈرائیور امتیاز عرف کاکا بھی دم توڑ گیا دونوں کی لاشیں ان کے ورثا کے حوالے کر دی گئی ہیں۔

ان دھماکوں میں سائیکلیں استعمال کی گئی تھیں پولیس نے ان پر کنندہ نمبروں اور ماڈل کے ذریعے ان بائسیکلوں کی فیکٹریوں اور دکانداروں سے رابطے کیے ہیں۔

پولیس نے لاری اڈہ میں ہلاک ہونے والے واحد شخص کے بارے میں یہ غلط اندازہ لگایا تھا کہ چونکہ اس کی شناخت نہیں ہو رہی اس لیے ممکن ہے کہ وہ ہی بمبار ہو، جو بم فٹ کرتے ہوئے مارا گیا لیکن بعد میں معلوم ہوا کہ وہ نواحی شہر فاروق آباد کا رہائشی ایک ایسا غریب نوجوان تھا جو محنت مزدوری کرنے لاہور آیا تھا اور دھماکے کے وقت بم کے پاس سے گذر رہا تھا کہ موت نے اسے آن لیا۔

اس کے ورثا روتے پیٹتے پہنچے تو پولیس نے اپنی تسلی کے کرنے کے بعد اس کی لاش بھی ورثا کے حوالے کر دی۔

لاہور کے تفتیشی ونگ کے سپرنٹنڈنٹ پولیس مسعود عزیز نے بی بی سی سے گفتگو کرتے ہوئے اس بات کی تصدیق کی کہ وہ متوفی اصل ملزم نہیں تھا۔

انہوں نے کہا کہ اگرچہ پولیس نے ابھی تک اصل ملزم گرفتار نہیں کیے تاہم ان کا دعوی ہے کہ پولیس کو چند اہم سراغ ملے ہیں جن کو اگرچہ وہ فی الحال بیان نہیں کر سکتے لیکن ان کا کہنا تھا کہ ان کی بنیاد پر ملزمان کو پکڑا جاسکتا ہے۔