ریاض سہیل بی بی سی اردو ڈاٹ کام کراچی

	حکام نے پانی کو زہریلا قرار دیا

محکمۂ صحت کے سیکریٹری ڈاکٹر نوشاد نے بتایا کہ لیبارٹری ٹیسٹ میں ثابت ہوا ہے کہ پانی نوے فیصد آلودہ ہے۔ اس میں گٹر کا پانی شامل ہوگیا تھا۔
انہوں نے بتایا کہ کوئی بھی مریض اسپتال میں فوت نہیں ہوا ہے بلکہ ہلاکتیں گھروں میں ہوئی ہیں جبکہ ساڑھے آٹھ سو لوگوں کا علاج کیا گیا ہے۔

وزیرِاعظم شوکت عزیز نے ہلاکتوں کی تحقیقات کا حکم دے دیا ہے۔ جبکہ سندھ کے گورنر عشرت العباد نے واٹر بورڈ کو ہدایت کی ہے کہ پانی کی فراہمی کی نگرانی کی جائے۔

واضح رہے کہ لانڈھی اور عوامی کالونی کے بعد شہر کے دیگر علاقوں میں بھی صورتحال خراب ہوگئی ہے اور داؤد چالی میں آلودہ پانی کے استعمال کی وجہ سے ہفتے کے روز چھ بچے ہلاک ہوگئے جن کی عمر چھ سے دس برس کے درمیان ہے۔

ٹاؤن ہیلتھ افسر ڈاکٹر خالد نے بی بی سی کو بتایا کہ داؤد چالی میں بھی پینے کی پانی میں گٹر کا پانی شامل ہوگیا ہے۔ انہوں نے کہا کہ اس علاقے میں کچھ مریض ہیں جن کے لیے علاقے میں طبّی کیمپ قائم کیا جارہا ہے جبکہ جن مریضوں کی حالت تشویشناک ہے انہیں دیگر ہسپتالوں میں بھیجا جا رہا ہے۔

دوسری جانب ٹی ایم او نظیر لاکھانی کا کہنا ہے کہ ہلاک ہونے والوں کی تعداد آٹھ ہوگئی ہے جن میں سے چھ داؤد چالی میں ہلاک ہونے والے بچے ہیں۔ انہوں نے بتایا کہ داؤد چالی ایک کچی آبادی ہے جہاں کے لوگوں نے پینے کا پانی حاصل کرنے کے لیے کچھ جوہڑوں سے بھی پلاسٹک کے پائپ سے کنکشن لیے ہوئے ہیں جبکہ یہ پائپ گندی نالے کے برابر یا ان کے اندر سےگزر رہے ہیں۔