عزیزاللہ خان بی بی سی اردو ڈاٹ کام ، کوئٹہ

کوئٹہ میں پچھلے برس بھی فرقہ وارانہ تشدد کے کئی بڑے واقعات ہوئے تھے۔

ڈپٹی انسپکٹر جنرل پولیس سلمان سید نے کہا ہے کہ پولیس نے کوئٹہ کے مختلف مقامات پر چھاپے مارے ہیں اور اب تک کوئی تین مشتبہ افراد کو حراست میں لیا گیا ہے۔ انھوں نے کہا ہے کہ چھاپوں کا سلسلسہ جاری ہے اور شہر میں حفاظی اقدامات سخت کر دیے گئے ہیں جہاں لگ بھگ ڈیڑھ ہزار پولیس اہلکار تعینات ہیں۔

کوئٹہ میں کل صبح نا معلوم افراد نے فائرنگ کرکے ایک پرایئویٹ سکول کے پرنسپل کو ہلاک کردیاتھا جبکہ ان کی بیوی اس واقعہ میں زخمی ہوئی ہے۔ پولیس حکام نے کہا ہے کہ یہ فرقہ وارانہ تشدد کا واقعہ نظر آتا ہے۔

طاہر رضا واپڈا کے ریٹائرڈ افسر تھے اور ان دنوں ایک پرایئویٹ سکول کھول رکھا تھا وہ اس سکول کے پرنسپل تھے اور ان کی بیوی اسی سکول میں پڑھاتی ہیں ۔کل صبح دونوں موٹر سائکل پر سکول جا رہے تھے کہ پہلے سے گھات لگائے بیٹھے نا معلوم افراد نے ان پر فائرنگ شروع کردی ۔ طاہر رضا موقع پر ہلاک ہو گئے جبکہ ان کی بیوی کو شدید زخمی حالت میں سول ہسپتال داخل کر دیا گیا ہے۔

سینیئر سپرنٹنڈنٹ پولیس پرویز ظہور نے کہا ہے کہ یہ فرقہ وارانہ تشدد کا واقعہ ہے۔

شعیہ کمیٹی کے صدر سید طاہر شاہ نے کہا ہے کہ یہ دہشت گردی ہے اور حکومت اس پر قابو پانے میں ناکام ہوئی ہے

اس واقعہ کے بعد اہل تشیع سے تعلق رکھنے والے افراد نے سول ہسپتال کے سامنے مظاہرہ کیا ہے اور زبردست نعرہ بازی کی ہے۔ انھوں نے جناح روڈ کو بلاک کر دیا تھا اور حکومت ے مطالبہ کیا ہے کہ فرقہ وارانہ تشدد کے واقعات میں ملوث افراد کو فوری طور پر گرفتار کیا جائے۔ بعد میں انسپکٹر جنرل پولیس چوہدری یعقوب کی یقین دہانی پر مظاہرین منتشر ہو گئے۔

دریں اثنا ایک نا معلوم شخص نے ٹیلیفون پر اپنا نام ضرار بتایا ہے اور کہا ہے کہ وہ کالعدم تنظیم لشکر جھنگوی کا نمائندہ ہے اور ان واقعات کی زمہ داری قبول کرتا ہے۔

یاد رہے کہ جمعہ کے روز نا معلوم افراد نے چلتن ہاوسنگ سکیم کے علاقے میں فائرنگ کرکے معروف ڈاکٹر نادر خان کو فائرنگ کرکے زخمی کر دیا تھا۔ ڈاکٹر نادر خان کا تعلق اہل تشیع سے بتایا گیا ہے۔