ہارون رشید بی بی سی اردو ڈاٹ کام، پشاور

سرکاری ادارے میں خاکروب کا کام کرنے والے پچیس سالہ دلاور مسیح

یہ الفاظ ہیں ایک سرکاری ادارے میں خاکروب کا کام کرنے والے پچیس سالہ دلاور مسیح کے۔ اس کی اقتصادی حالت کی غیر یقینی کا اندازہ اس سے لگائے کہ وہ گزشتہ چار برسوں سے اس بجلی مہیا کرنے والے ادارے سے منسلک ہے لیکن اس کی نوکری پکی نہیں۔

دلاور کی اس سادہ سی بات سے ظاہر ہوتا ہے کہ اس کو مکانوں یا زمینوں کی قیمتوں میں اضافے یا پیٹرول کی مہنگائی کی پریشانی نہیں نہ اس کا اپنا مکان ہے اور نہ زمین۔ پیٹرول اسے چاہیے نہیں کیونکہ اس کی کھٹارا سائیکل اسے جہاں چاہے بغیر کسی بڑے خرچے کے پہنچا دیتی ہے۔

اسے صرف پریشانی ہے تو اشیاء خورد ونوش کی قیمتوں میں اضافے کی۔ آخر سائیکل کے لئے پیٹرول نہ صحیح اپنا اور اپنی بیوی بچی کا پیٹ بھرنے کے لئے تو کچھ نہ کچھ چاہیے

تنخواہ کے بارے میں پوچھا تو اس نے انتہائی سادگی سے ہکلاتے ہوئے بتایا کہ اس ادارے سے اسے تین ہزار چھ سو ساٹھ روپے ماہوار کے ملتے ہیں۔ اس نوکری کے علاوہ وہ بعد میں چار گھروں میں جا کر صفائی ستھرائی بھی کرتا ہے جس سے اسے ہزار بارہ سو روپے مزید آمدن ہوجاتی ہے۔

لیکن ایک بیوی اور دو سالہ بچی جیسا مختصر خاندان ہونے کے باوجود اس کا گزارا نہیں ہو پاتا۔ ’ہم اوکھا سوکھا گزارا تو کر رہے ہیں لیکن بچت کوئی نہیں۔ گھر میں ایک بیماری سب کچھ برابر کر دیتی ہے۔‘

کرائے کے ایک چھوٹے سے مکان میں بسنے والے دلاور کا کہنا ہے کہ اس تنخواہ میں سے آٹھ سو تو کرائے میں نکل جاتے ہیں۔ باقی کھانے پینے اور کپڑوں پر ہی لگ جاتے ہیں۔

اسے آئندہ مالی سال کے بجٹ سے ایک ہی امید ہے کہ شاید اس اربوں روپے کے ’ہیر پھیر‘ میں کم از کم ان کی تنخواہیں ہی بڑھا دی جائیں اور اس کی نوکری پکی ہوجائے۔

دلاور کے اس سوال کا میرے پاس کوئی جواب نہیں تھا کہ آیا ان کے لئے اس بجٹ میں کچھ ہوگا یا نہیں۔

اقتصادی ماہرین کے مطابق غربت پاکستان کا سب سے بڑا مسلہ ہے جس پر سب سے کم توجہ دی جاتی ہے۔

کیا نیا بجٹ اس اعتبار سے ماضی سے کچھ مختلف ہوگا؟