اعجاز مہر
بی بی سی اردو ڈاٹ کام، اسلام آباد |  |
|  پاکستان اور برطانیہ میں مشترکہ جنگی مشقوں پر اتفاق |
پاکستان اور برطانیہ نے بدھ کے روز دفاعی تعاون بڑھانے کے بارے میں ایک مفاہمت کے یاداشت نامے پر دستخط کیے ہیں۔ وزارت دفاع سے جاری ہونے والے بیان میں بتایا گیا ہے کہ اس یاداشت نامے کے بعد دفاعی خریداری اور ٹیکنالوجی کی منتقلی میں مدد ملے گی۔ تاہم دونوں فریقین نے یہ تفصیلات نہیں بتائی کہ پاکستان کو کس نوعیت کی ٹیکنالوجی یا دفاعی آلات کی ضرورت ہے۔ اس یاداشت نامے پر دفاعی پیداوار کی وزارت کے سیکریٹری لیفٹیننٹ جنرل ( ر) علی محمد جان اورکزئی اور برطانوی وزارت دفاع کے انڈر سیکریٹری، سر کیون آر ٹیبٹ نے دستخط کیے ہیں۔ اس معاہدے کے علاوہ دونوں ممالک کے دفاعی تعاون کے گروپ کے ساتویں اجلاس کے اختتام پر اس اجلاس کے اہم نکات کی دستاویز پر دستخط بھی کیے گئے۔ دونوں ممالک کے نمائندوں نے مشترکہ جنگی مشقیں کرنے اور دہشت گردی کے خلاف جنگ میں تعاون وسیع کرنے پر اتفاق کیا اور کہا کہ ایک دوسرے کے تجربات اور مہارت سے فائدہ اٹھانے کے لیے سیمینار اور ورکشاپ منعقد کیے جائیں گے۔ حکام کا کہنا ہے کہ دونوں ممالک کے نمائندوں نے انٹیلی جنس کی معلومات کے تبادلے پر بھی اتفاق کیا ہے۔ وزارت دفاع سے جاری بیان کے مطابق برطانوی انڈر سیکریٹری نے اس موقع پر کہا کہ دونوں ممالک کے درمیان پہلے سے موجود دفاعی تعاون کے تعلقات کو مزید وسیع کرنے کی ضرورت ہے تاکہ اکیسویں صدی کے ’چیلینجز، کا مقابلہ کیا جاسکے۔ | 
یہ صفحہ دوست کو ای میل کیجیئے
پرِنٹ کریں
