واشنگٹن ٹائمز کے مدیر ویزلے پروڈن نے پاکستان سفارت خانے کو ایک خط میں لکھا ہے کہ اخبار کے کارٹونسٹ نے نادانستہ طور پر پاکستان کے لوگوں کے جذبات کو مجروح کیا ہے۔

انہوں نے کہا کہ کارٹونسٹ اور اخبار کا ہر گز یہ مقصد نہیں تھا کہ وہ پاکستان کے عوام کے جذبات کو مجروح کریں۔ انہوں نے کارٹون کے شائع ہونے سے پاکستان میں پیدا ہونے والی غلط فہمی پر بھی معذرت کا اظہار کیا۔

گزشتہ جمعہ کو واشنگٹن ٹائمز میں شائع ہونے والے کارٹون پر پاکستان حکومت نے اخبار سے شدید احتجاج کیا تھا اور پاکستانی سفارت خانے کے ذریعے انہیں پاکستان میں پائے جانے والے غم و غصے سے آگاہ کیا۔

آخبار کے مدیر نے اس خط کے ذریعے پاکستانی سفارت خانے کو اس بات کی یقین دہانی بھی کرائی کہ وہ پاکستان اور پاکستان کے عوام کی عزت کی نگاہ سے دیکھتے ہیں۔

انہوں نے مزید کہا کہ کارٹونسٹ دہشت گردی کے خلاف مہم میں پاکستان بحیثیت خومختار ملک اور امریکہ کے ایک اہم اتحادی کے طور پر جو کردار ادا کر رہا ہے اس کو اجاگر کرنا چاہتے تھے۔