بس سروس کے اعلان کے بعد لوگوں میں اس کے لیے بہت دلچسپی دیکھی گئی تھی

پاکستان میں بی بی سی کے نامہ نگار ظفر عباس کا کہنا ہے کہ دھماکے کے بعد لوگ میں یقینی طور پر تجسس پایا جاتا ہے کہ آیا دھماکہ حادثہ تھا، کسی نے حملہ کیا یا یہ کوئی پرانی بارودی سرنگ تھی جو پھٹ گئی۔

انہوں نے کہا کہ ایسا کوئی اشارہ نہیں ملا کہ کوئی مسافر اس دھماکے کے بعد بس پر سفر کرنے کا پروگرام منسوخ کرنے کی سوچ رہا ہو۔

مجوزہ راستے پر بارودی سرنگ کے دھماکے میں سات افراد زخمی ہو گئے ہیں۔

نامہ نگار نے کہا کہ پاکستان کے زیر انتظام کشمیر میں حکام حفاظتی انتظامات کے بارے میں پر اعتماد ہیں۔

بھارت کے زیر انتظام کشمیر میں بی بی سی کے نامہ نگار شکیل اختر نے بتایا کہ بس سروس کے خلاف دھمکیوں کا کچھ اثر تو ضرور ہے لیکن لوگ عام طور پر بس سروس کے بارے میں خوش ہیں اور اسے اچھی پیش رفت سمجھ رہے ہیں۔

انہوں نے کہا کہ دھماکے کے بعد بھارتی حکام نے انتظامات سخت کر دیئے ہیں جس پر تنقید بھی کی گئی ہے۔ انہوں نے کشمیر میں علیحدگی پسند تنظیموں کے حوالے سے بتایا کہ انہوں نے کہا ہے کہ حکومت بس سروس کے نام پر شہریوں کو حراساں کر رہی ہے۔

شکیل اختر نے کہا کہ جگہ جگہ ناکے لگائے جا رہے ہیں اور لوگوں کی تلاشی لی جا رہی ہے۔

انہوں نے کہا کہ کشمیر میں لوگوں کا خیال ہے کہ بس سروس اچھی چیز ہے لیکن اس کو مسئلے کا حل نہیں سمجھنا چاہیے۔

بی بی سی کے نامہ نگار کا کہنا تھا کہ کشمیر میں منقسم خاندانوں کے علاوہ بھی لوگوں کا خیال ہے کہ اگر بس سروس سے حالات بہتری کی طرف جاتے ہیں تو یہ ٹھیک ہے۔

ظفر عباس نے بتایا کہ پاکستان کے زیر انتظام کشمیر میں بھی اسی طرح کے جذبات پائے جاتے ہیں لیکن یہ بھی کہا جاتا ہے کہ بس سروس کو مسئلے کا حل نہ سمجھا جائے۔

پاکستان اور بھارت کے زیرِ انتظام کشمیر کے دونوں حصوں کے درمیان تاریخی بس سروس کا آغاز جمعرات سے ہو رہا ہے۔

اس سے قبل بھارت کے زیرِ انتظام کشمیر کے حکام نے بتایا تھا کہ بھارتی فوجیوں نے بس کے مجوزہ راستے پر نصب دو بارودی سرنگوں کو ناکارہ بنا دیا ہے۔ یہ بارودی سرنگیں سری نگر سے پچیس کلومیٹر دور پلہالن نامی گاؤں کے نزدیک نصب کی گئی تھیں۔