مبشر زیدی بی بی سی اردو ڈاٹ کام اسلام آباد

امریکی وزیر خارجہ نے آج ہی اپنا ہندوستان کا دورہ مکمل کیا ہے

امریکی وزیر خارجہ کی پاکستانی رہنماؤں سے بات چیت میں پاکستان بھارت مذاکرات، پاکستان کو ایف سولہ طیاروں کی فراہمی، افغانستان، دہشت گردی کے خلاف جنگ اور دیگر دو طرفہ معاملات زیر بحث آئیں گے۔

امریکی وزیر خارجہ نے اسلام آباد میں امریکی سفارتخانے میں امریکی سفیر اور دیگر امریکی عہدیداروں سے ملاقات کی ہے جس کے بعد وہ وزیر اعظم شوکت عزیز سے ملنے وزیر اعظم ہاؤس جائیں گی۔

وزیر اعظم سے ملاقات کے بعد وہ صدر جنرل مشرف سے ملاقات کریں گی اور اس کے بعد صدر کی طرف سے دیئے گئے عشائیے میں بھی شرکت کریں گی۔

تاہم اس دوران ذرائع ابلاغ کے نمائندوں کو ان کی ملاقاتوں کی کوریج کی اجازت نہیں ہو گی۔تاہم وزیر اعظم کے ساتھ اپنی ملاقات سے قبل وہ ایک کیمرہ سیشن کروائیں گی جس میں صحافیوں کو مدعو نہیں کیا گیا ہے۔

امریکی وزیر خارجہ جمعرات کی صبح افغانستان جائیں گی جہاں وہ افغانستان کے صدر حامد کرزئی اور وزیر خارجہ عبداللہ عبداللہ سے ملاقات کریں گی۔

امریکی وزیر خارجہ جمعرات کی شام اسلام آباد واپس آئیں گی اور اپنے پاکستانی ہم منصب خورشید قصوری سے ملاقات کریں گی اور توقع ہے کہ وہ ایک مشترکہ پریس کانفرنس سے بھی خطاب کریں گی۔