اعجاز مہر بی بی سی اردو ڈاٹ کام، اسلام آباد

گورنر سید افتخار حسین شاہ نے استعفیٰ دینے کے وجہ ذاتی مصروفیات ہی بتائی ہے

حکومت اور مستعفی ہونے والے گورنر سید افتخار حسین شاہ نے استعفیٰ دینے کے وجہ ذاتی مصروفیات ہی بتائی ہے۔

کمانڈر ریٹائرڈ خلیل الرحمٰن اس وقت پارلیمان کے ایوان بالا یعنی سینیٹ کے ڈپٹی چیئرمین ہیں۔ وہ صوبہ سرحد سے حکمران مسلم لیگ کی ٹکٹ پر سینیٹ کے رکن منتخب ہوئے تھے۔ وہ سینیٹ کی رکنیت سے مستعفی ہوکر جلد ہی اپنے نئے عہدے کا چارج سنبھالیں گے۔

اس وقت مرکز کی سطح پر حزب مخالف میں شامل مذہبی اتحاد ’متحدہ مجلس عمل‘ کی صوبہ سرحد میں حکومت قائم ہے۔

موجودہ گورنر کے مستعفی ہونے اور کمانڈر ریٹائرڈ خلیل الرحمٰن کی تقرری کے متعلق خبریں گزشتہ چند روز سے مل رہی تھیں لیکن سرکاری طور پر کوئی بھی اس کی تصدیق نہیں کر رہا تھا۔

حکام کا کہنا ہے کہ نئے تعینات ہونے والے گورنر کا چند روز قبل بحرین میں بیٹا فوت ہوگیا تھا اور اس کی وجہ سے ان کی تقرری کے احکامات جاری ہونے میں کچھ دن کی تاخیر کی گئی۔

مبصرین کی رائے ہے کہ نئے گورنر کو جہاں حزب مخالف جماعتوں کی حکومت کے ساتھ معاملات چلانے ہوں گے وہاں ان کے لیے وفاق کے زیرانتظام قبائلی علاقوں میں القائدہ کے حامیوں کے خلاف جاری کارروائی کو بھی دیکھنا ہوگا۔

واضح رہے کہ ان کے سینیٹ سے مستعفی ہونے کی صورت میں جو نشست خالی ہوگی اس پر ضمنی انتخاب ہوگا اور قوی امکان متحدہ مجلس عمل کے کسی امیدوار کے منتخب ہونے کا ہی ہے۔ کیونکہ مذہبی اتحاد کو ہی صوبائی اسمبلی میں اکثریت حاصل ہے۔