عدنان عادل
بی بی سی اردو ڈاٹ کام، لاہور |  |
|  یاتری شری کٹاس راج مندر پر ماہا شوا راتری میلے میں شرکت کے لیے چکوال جائیں گے |
اتوار کو ایک سو پچانوے ہندو یاتری اپنے دیوتا شوا سے منسلک ایک مذہبی میلہ میں شرکت کے لیے واہگہ کے ذریعے لاہور پہنچے۔ یہ یاتری ڈیرہ گوردوارہ صاحب کی یاترا کے بعد شری کٹاس راج مندر پر ماہا شوا راتری میلہ میں شرکت کے لیے چکوال جائیں گے۔ ماہا شوا راتری کا مطلب ہے ہندو دیوتا شوا کی رات۔ شوا دیوتا ہندو مذہب میں فنا کرنے والا اور دوبارہ پیدا کرنے والا دیوتا سمجھا جاتا ہے۔ ہندو عقیدہ کے مطابق یہ تہوار تین وجوہ کی بنا پر منایا جاتا ہے۔ ایک تو سدا شوا دیوتا، جس کی کوئی شکل نہیں، وہ آدھی رات کے وقت نمودار ہوا تھا اور دوسرے اس نے پاروتی سے شادی کی تھی جو انسانی روح کے دیوتا سے ملنے کی علامت ہے۔ تیسرے شوا دیوتا نے وہ مہلک زہر پی لیا تھا اور اسے اپنی گردن میں روک لیا تھا جس زہر کا ایک قطرہ بھی اگر اس کے پیٹ، جو کائنات کی علامت ہے، تک پہنچ جاتا تو دنیا ختم ہوجاتی۔ اس لیے ہندو مذہب میں ماہا شوا راتری کی رات کو دنیا کو بچانے کے لیے شوا دیوتا کا شکریہ ادا کرنے کے طور پر منایا جاتا ہے۔ اس رات ہندو عقیدت مند بھوکے رہتے ہیں اور بعض لوگ پانی بھی نہیں پیتے۔ یہ یاتری رات بھر جاگ کر سوا کی پوجا کرتے ہیں اور اوم ناما شو یا پکارتے رہتے ہیں۔ ہندووں کا عقیدہ ہے کہ جو شخص لگن سے ساری رات شوا کا نام پکارتا ہے وہ گناہوں سے پاک ہوجاتا ہے۔ اندرون سندھ میں ہندو آبادی اس میلہ کو بہت اہتمام سے مناتی ہے اور اس کی تقریبات کراچی میں کلفٹن میں شوا کے مندر میں بھی ہوتی ہیں۔گزشتہ سال بھی اس میلہ میں شرکت کے لیے ایک سو ساٹھ ہندو یاتری بھارت سے پاکستان آئے تھے۔ | 
یہ صفحہ دوست کو ای میل کیجیئے
پرِنٹ کریں
