ہارون رشید
بی بی سی ادو ڈاٹ کام، سراروغا (جنوبی وزیرستان) |  |
|  سینکڑوں محسود جنگجوؤں کی جانب سے ان کے امیر بیت اللہ محسود نے دستخط کیے |
پاکستان کے قبائلی علاقے جنوبی وزیرستان میں محسود جنگجوؤں اور حکومت کے درمیان آج سراروغا کے مقام پر امن معاہدے پر دستخط ہوگئے ہیں۔ یہ دستخط سراروغا کے ایک کھلے میدان میں ہزاروں قبائلیوں کی جن میں اکثریت ملسح جنگجوؤں کی تھی موجودگی میں ہوئے۔ اس موقع پر سیکورٹی کے انتظامات بھی مسلح جنگجوؤں کے ہاتھوں میں تھے۔ سینکڑوں محسود جنگجوؤں کی جانب سے چھ نکاتی معاہدے پر دستخط ان کے امیر بیت اللہ محسود جبکہ حکومت کی جانب سے اسٹینٹ پولیٹکل آفیسر عبدالکمال نے کئے۔ تمام تقریب کے دوران بیت اللہ محسود نے اپنے چہرے کو ایک چادر میں لپٹے رکھا تاکہ کوئی فوٹو گرافر ان کی تصویر نہ بنا سکے۔ |  تقریب کے موقع پر سکیورٹی انتظام جنگجوؤں کے ہاتھ میں تھا |
بیت اللہ جب تقریر کے لئے کھڑے ہوئے تو جلسے میں شریک شرکاء نے امریکہ مردہ باد کے نعرے بھی لگائے۔ بیت اللہ اور دیگر مقررین نے اپنے خطاب میں معاہدے پر خوشی کا اظہار کرتے ہوئے امید کی کہ حکومت ان کے علاقے کی ترقیاتی کاموں کے ذریعے کایا پلٹنے کے جو وعدے کر رہی تھی انہیں اب پورا کیا جائے گا۔ سرکاری نمائندے نے اس موقع محسود قوم کا معاہدہ کرنے پر شکریہ ادا کیا اور اعلان کیا کہ حکومت کئی ماہ سے بند سپنکئی رغزئی بازار کو دوبارہ کھولنے کے لئے کل سے مذاکرات شروع کرے گی۔ کئی مبصرین کے خیال میں حکومت کی جانب سے کسی اعلی سرکاری اہلکار کی عدم شرکت سے ظاہر ہوتا تھا کہ شاید حکومت شکئی کی طرح اس معاہدے کو اہمیت نہیں دی۔ لیکن ایک سرکاری اہلکار نے اس کی تردید کی۔ اس معاہدے سے محسود علاقوں میں بھی توقع ہے کہ حالات معمول پر آجائیں گے۔ لیکن مکمل امن کی بحالی پر سوالیہ نشان دو چینی انجینروں کے اغوا میں ملوث عبداللہ محسود کی وجہ سے شاید لگا رہے گا۔ حکومت کا کہنا ہے کہ اسے چین کے ساتھ تعلقات خراب کرنے کی کوشش کی وجہ سے قانون کا سامنا کرنا پڑے گا۔ | 
یہ صفحہ دوست کو ای میل کیجیئے
پرِنٹ کریں
