مبشر زیدی
بی بی سی اردو ڈاٹ کام، اسلام آباد |  |
امریکی نائب وزیر دفاع ڈگلس فیتھ نے کہا ہے کہ پاکستان کو ایف 16 طیارے دینے کی پاکستانی درخواست بدستور زیر غور ہے اور اس کا فیصلہ صحیح وقت پر کیا جائے گا۔ پاکستان اور امریکہ کے سولہویں دفاعی مشاورتی اجلاس کے بعد راولپنڈی میں صحافیوں سے بات کرتے ہوئے امریکی نائب وزیر دفاع نے کہا کہ ایف 16 طیاروں کا مسئلہ اہم ہے اور اس کا فیصلہ صحیح وقت پر ہو گا۔ تاہم پاکستانی سیکریٹری دفاع لیفٹیننٹ جنرل حامد نواز نے اس موقع پر کہا کہ یہ مسئلہ بدستور ایجنڈے پر ہے اور اس کے حل کی امید ہے مگر ایسا کب ہو گا اس بارے میں وہ کچھ نہیں کہہ سکتے۔ انہوں نے بتایا کہ اس مشاورتی اجلاس میں پاکستان کی دفاعی ضروریات پوری کرنے کے حوالے سے خاصی پیش رفت ہوئی ہے مگر وہ اس کی تفصیلات ابھی نہیں بتا سکتے۔ پاکستانی سیکریٹری دفاع نے بتایا کہ امریکہ کی طرف سے پاکستان کو سی ون تھرٹی ٹرانسپورٹ طیارے مارچ کے پہلے ہفتے میں پاکستان پہنچ جائیں گے۔ امریکی نائب وزیر دفاع نے کہا کہ امریکہ اور پاکستان کے درمیان دفاعی تعلقات اچھے ہیں اور اس اجلاس کے بعد وہ مزید بہتر ہوئے ہیں۔ انہوں نے کہا کہ اس اجلاس میں انہیں پاکستان کے موقف کو سمجھنے میں مدد ملی ہے۔ ڈگلس فیتھ نے کہا کہ اجلاس میں عراق میں حالیہ انتخابات، افغانستان میں انتخابات، پاکستان اور بھارت کے مابین جاری مذاکراتی عمل، دہشت گردی کے خلاف جنگ اور خطے کی عمومی دفاعی صورتحال پر بات کی گئی۔ انھوں نے کہا کہ پاکستان نے اپنی دفاعی ترجیحات کے حوالے سے امریکی وفد کو ایک تفصیلی بریفنگ دی ہے۔ | 
یہ صفحہ دوست کو ای میل کیجیئے
پرِنٹ کریں
