’ یہ حملہ اسرائیلی وزیرِاعظم کے انٹرویو کی دی نیوز میں اخبار میں اشاعت کا ردعمل ہو سکتا ہے‘

یہ ٹی وی چینل اور اخبارات جنگ گروپ کی ملکیت ہیں اور ان کے دفاتر آئی آئی چندریگر روڈ پر واقع ہیں۔

’جیو‘ کے ڈائریکٹر نیوز اظہر عباس نے بی بی سی کو بتایا کہ حملہ آور پینتیس کے قریب تھے اور انہوں نے عمارت میں گھس کر توڑ پھوڑ کی اور استقبالیہ کو آگ لگا دی۔حملہ آوروں نے دفتر کے باہر موجود صحافیوں اور عملے کی گاڑیوں کو بھی نقصان پہنچایا اور ان کے شیشے توڑ دیے۔

مزاحمت کرنے پر حملہ آوروں نے سکیورٹی گارڈز کو دھکے دیے اور عملے کو زدوکوب بھی کیا۔ اس موقع پر فائرنگ کا تبادلہ بھی ہوا مگر کوئی جانی نقصان نہیں ہوا۔

حملہ آور موٹر سائیکلوں پر سوار تھے اور اللہ اکبر کے نعرے لگا رہے تھے۔ جائے واردات کے نزدیک پولیس کی ایک موبائل بھی موجود تھی مگر اس کی جانب سے کسی قسم کی کارروائی نہیں کی گئی۔

حملے کی وجہ تو معلوم نہیں ہو سکی ہے لیکن ’جیو‘ کے ڈائریکٹر نیوز اظہر عباس کا کہنا تھا کہ یہ حملہ اسرائیلی وزیرِاعظم کے انٹرویو کی دی نیوز میں اخبار میں اشاعت کا ردعمل ہو سکتا ہے۔ یاد رہے کہ ’جیو ٹی وی‘ نے بھی اس انٹرویو کو اپنی نشریات میں اہم جگہ دی تھی۔