ہارون رشید
بی بی سی اردو ڈاٹ کام، پشاور |  |
|  جوہر میر کا امریکہ میں انتقال ہوا |
اردو کے ممتاز صحافی اور ادیب جوہر میر کو جمعہ کی شام پشاور میں سپرد خاک کر دیا گیا ہے۔ ان کی عمر اڑسٹھ برس تھی۔ سید قربان علی المعروف جوہر میر کا، جو کہ کینسر کے مرض میں مبتلا تھے، بدھ کے روز امریکہ میں انتقال ہوگیا تھا۔ صوبہ سرحد میں فنون لطیفہ کے شعبے کے حوالے سے زرخیز زمین پشاور سے تعلق رکھنے والے جوہر میر نے اپنی صحافتی زندگی کا آغاز سن ساٹھ کے عشرے میں روزنامہ انجام سے کیا اور بعد میں وہ پیپلز پارٹی کے اخبار مساوات سے بھی وابستہ رہے۔ پیپلز پارٹی کے ساتھ یہ وابستگی صرف اخبار تک ہی محدود نہ تھی بلکہ وہ پارٹی کی اس وقت کی ترقی پسند سوچ کی وجہ سے اس کی جانب کھچے رہے۔ وہ ایک ٹریڈ یونینسٹ بھی رہے جس کی وجہ سے وہ خیبر یونین آف جرنلسٹ کےصدر بھی منتخب ہوئے۔ جنرل ضیاء الحق کے مارشل لاء دور میں وہ ان جمہوریت پسند صحافیوں میں شامل تھے جنہوں نے جیل کی صعوبتیں برداشت کیں۔ انہیں گرفتار کر کے کراچی جیل میں رکھا گیا جہاں انہوں نے دیگر سیاسی قیدیوں کے ہمراہ اٹھارہ روز کی طویل بھوک ہڑتال بھی کی تھی۔ رہائی پانے پر جوہر میر نے امریکہ میں خود ساختہ جلا وطنی اختیار کر لی۔ امریکہ میں قیام کے دوران بھی وہ پاکستان کے مختلف اخبارات کے لئے کالم نگاری کرتے رہے۔ لیکن ساتھ میں اردو زبان کے فروغ کا کام بھی دیار غیر میں جاری رکھا۔ وہ امریکہ سے اردو زبان کے ماہنامہ زاویہ کے مدیر کے فرائض بھی انجام دیتے رہے۔ مرحوم حلقہ ارباب ذوق نیویارک کے سرپرست اعلیٰ بھی تھے۔ اردو کے علاوہ جوہر میر نے اپنی مادری زبان ہندکو میں بھی طبع آزمائی کی۔ ان کا لکھا ہوا ڈرامہ ’تتیاں چھاواں‘ پشاور ٹیلی وژن سینٹر سے نشر ہونے والا پہلا ہندکو ڈرامہ ثابت تھا۔ ان کے جنازے میں بڑی تعداد میں شعرا اور ادیبوں نے شرکت کی۔ | 
یہ صفحہ دوست کو ای میل کیجیئے
پرِنٹ کریں
