اعجاز مہر بی بی سی اردو ڈاٹ کام‘ اسلام آباد

امریکی سفارتخانے کو دہشت گردی کے خطرے کے پیشِ نظر بند کر دیا گیا تھا

پیر کے روز مبینہ دہشت گردی کے خطرے کے پیش نظر اسلام آباد میں امریکہ کی یوم آزادی کی تقریب عین وقت پر ملتوی کردی گئی تھی اور ویزا سیکشن بند کر دیا گیا تھا۔

پاکستان میں برطانوی ہائی کمیشن کو بھی پیر کے روز نامعلوم فون پر ملنے والی دھمکیوں کے بعد عارضی طور پر بند کرنے کا اعلان کیا گیا تھا۔

سفارتی علاقے کی حفاظت کے ذمہ دار خصوصی پولیس فورس کے سربراہ ، ایس پی انعام غنی نے بتایا کہ پولیس تحقیقات کر رہی ہے اور فون پر برطانوی ہائی کمیشن کو دھمکیاں دینے والے شخص کی تلاش جاری ہے۔

منگل کے روز برطانوی ڈپٹی ہائی کمشنر مارک سیڈ ول نے وزیراعظم چودھری شجاعت حسین سے ملاقات کی ۔ ملاقات کے بارے میں سرکاری اعلامیہ کے مطابق وزیراعظم نے انہیں یقین دلایا کہ ان کی حکومت سفارتی عملے کو مکمل تحفظ اور تعاون فراہم کرے گی۔

برطانوی ہائی کمیشن بدستور بند رہے گا

برطانوی ہائی کمیشن کے شعبہ اطلاعات کے افسر ٹم ہینڈلی کا کہنا تھا کہ انہیں فون پر دھمکیاں موصول ہوئی تھیں جس کے بعد ہائی کمیشن کے عملے کی سلامتی کو لاحق خطرے کے باعث ہائی کمیشن بند کیا گیا ہے۔

وہ یہ بھی دعویٰ کر رہے تھے کہ امریکی سفارتخانہ اور برطانوی ہائی کمیشن عارضی طور پر بند کیے گئے ہیں۔

پولیس حکام کے مطابق سفارتی علاقہ میں حفاظتی انتظامات مزید سخت کردیئے گئے ہیں اور انسداد دہشت گردی پولیس سکواڈ کا گشت بڑھا دیا گیا ہے۔