اعجاز مہر بی بی سی اردو ڈاٹ کام، اسلام آباد

مسعود خان کے مطابق میٹنگ کا مقصد دونوں ملکوں کی افواج میں رابطہ بہتر بنانا ہے

پیر کے روز ہفتہ وار بریفنگ کے دوران ان کا کہنا تھا کہ اس میٹنگ کا مقصد پاکستان اور امریکی افواج میں رابطہ بہتر بنانا اور غلط فہمیاں دور کرنا ہے۔ تاہم وہ یہ بھی کہہ رہے تھے کہ پاک افغان سرحد پر ’لواڑہ منڈی‘کے مقام پر اس مجوزہ ملاقات میں سرحدی صورتحال کا جائزہ بھی لیا جائے گا۔

جب ان سے پوچھا گیا کہ پاکستان میں داخل ہونے والے امریکی فوجیوں کو گرفتار کیوں نہیں کیا جاتا تو انہوں نے کہا کہ پاکستان صورتحال کو خراب کرنے کے بجائے اسے سدھارنا چاہتا ہے ۔

واضع رہے کہ ایک ماہ سے بھی کم عرصے میں دو مرتبہ امریکی افواج مینہ طور پر پاکستان میں داخل ہوئیں، جس پر پاکستان نے امریکہ سے سخت احتجاج کیا تھا اور امریکہ نے اسے غلطی قرار دیا تھا۔

ایسی صورتحال میں افغانستان میں تعینات امریکی افواج اور پاکستانی فوج کے مقامی کمانڈرز کی پہلی باضابطہ ملاقات ہو رہی ہے۔

ترجمان کا پاک بھارت مذاکرات کے حوالے سے مختلف سوالات کے جواب میں کہنا تھا کہ بھارت میں نئی قائم ہونے والی حکومت نے مزاکرات جاری رکھنے کا اعلان کیا ہے جو کہ حوصلہ افزا ہے۔

تاہم انہوں نے امید ظاہر کی کہ دونوں ممالک کے طے کردہ ملاقاتوں کے کیلینڈر کے مطابق نئی بھارتی حکومت معاملات کو آگے بڑھائے گی۔